Memlekettik satyp alý júiesin tolyq avtomattandyrýdyń nátijesinde 130 mlrd. teńge únemdeldi. Bul týraly búgin Úkimet otyrysynda QR Qarjy ministri Baqyt Sultanov málim etti, dep habarlaidy "Ult aqparat" QazAqparat agenttigine silteme jasap.
«Memlekettik satyp alý júiesin tolyqtai avtomattandyrý elektrondy kameraly baqylaýdyń qurylýyna túrtki boldy. Endigi ýaqytta ol nysanǵa barmastan, veb-portal arqyly onlain-rejimde júzege asyrylady. Atalǵan sharalar bir konkýrsqa qatysýshylardyń sanyn shamamen 4 esege 1-2-den 4-ke deiin arttyrýǵa jáne únemdi úsh ese ulǵaityp, 43 mlrd. teńgeden 130 mlrd. teńgege deiin jetkizýge múmkindik berdi», - dep atap ótti ol.
Degenmen, ministr memlekettik satyp alý salasynda sheshilmegen birqatar problemanyń qalyp otyrǵandyǵyn da jasyrmady.
«Birinshi kezekte, bul bir kózden satyp alý úlesiniń kólemdi bolýyna qatysty. Bul jemqorlyq kórinisteri táýekelderine túrtki bolady. Máselen, 2014 jyly jalpy kólemdegi mundai satyp alý úlesi 79 protsentti, 2015 jyly 75 protsentti, 2016 jyly 69 protsentti qurady. Buǵan qosa, atalǵan bir kózden satyp alýdyń 69 protsenti zańmen kózdelgen negiz boiynsha satyp alýlardyń úlesine tiesili. Buǵan deiin mundai satyp alýlar Zań normasyn qoldanbai júrgiziletin. Qazir bul ádistiń barlyq protsedýralary portalda rásimdeledi. Bul olarǵa monitoring júrgizýge múmkindik beredi. Qalǵan 30 protsenti konkýrstyń ótpeýi nátijesinde tańdap alynǵan bir kózden satyp alýlarǵa tiesili. Dál osy bir kózden satyp alý túri jemqorlyq táýekelge barynsha beiim», - dedi Sultanov.
Onyń aitýynsha, ótkizilmegen konkýrstardyń negizgi úlesi qurylys jumystarmen bailanysty. Jalpy mundai bir konkýrsqa 7-8 kompaniia qatysady. Degenmen, qurylystaǵy satyp alýlar ótinimderiniń keri qaitarylýynyń basty sebebi jobalyq-smetalyq qujattarǵa bailanysty.
«Taǵy da bir mańyzdy problema satyp alýlarǵa qatysýshylardyń basym bóliginiń biliktilikteriniń tómendigi bolyp otyr. Bul sapasyz taýarlar, jumystar men qyzmetterdi satyp alýǵa sebep. Atalǵan problemany aldyn ala biliktiliktik irikteý institýtyn keńinen paidalaný arqyly sheshýge bolady. Qazirgi ýaqytta memlekettik satyp alýlardaǵy mundai tásil birinshi sanattaǵy kúrdeli qurylystarda ǵana qarastyrylǵan. Sondyqtan satyp alýdyń osy tásili arqyly satyp alynatyn taýarlar, qyzmetter men jumystardyń tizimin keńeitý jumystaryn júrgizýdemiz», - dedi ministr.
