Tanymal qazaqstandyq ártis, halyqaralyq baiqaýlardyń gran-pri iegeri, «Astana Operanyń» jetekshi solisi Baqtiiar Adamjan 24 naýryz kúni Memlekettik Kreml Saraiynda óner kórsetti (Resei, Máskeý). «QOLTAŃBA men BEDEL» jobasynyń aiasynda aty ańyzǵa ainalǵan ártis Rýdolf Nýreevtiń qurmetine orai daryndy bishi ári baletmeisterdiń 80 jyldyǵyna «Rýdolf Nýreev. Ótkennen bolashaqqa» atty álemdik balet juldyzdarynyń gala-kontserti usynyldy.
Osy keshte B.Adamjan «Esmeralda» baletinen (Ts.Pýni mýzykasy, A.Vaganovanyń horeografiiasy) «Diana men Akteon» pa-de-desi men «Parij Qudai anasynyń sobory» baletinen (M.Jarr mýzykasy, R.Petidiń horeografiiasy) «Kvazimodo men Esmeralda» adajiosyn oryndady. Onyń sahnadaǵy áriptesi Qazaqstannyń eńbek sińirgen qairatkeri, «Astana Operanyń» jetekshi solisi Mádina Basbaeva boldy. Máskeýlik kórermen qazaqstandyq jupty shattyqpen qarsy alyp, ár nómirinen keiin ystyq yqylasqa bóledi.
Eske salar bolsaq, osy rólderdi bir kezderi Rýdolf Nýreev asqan sheberlikpen oryndaǵan edi. Ol HH ǵasyrdyń eń jarqyn bishisi boldy. Dál Nýreevtiń ózi erler bii salasynda naǵyz revoliýtsiia jasaǵan bolatyn. Ol kózi tirisinde klassikalyq balette de, sonymen qatar zamanaýi horeografiiada da birdei qalypta qala otyryp, aty ańyzǵa ainalǵan tulǵa boldy.
- Osynaý tamasha kontserttik baǵdarlamaǵa áriptesterim – álemdik sahnadaǵy aitýly ártistermen birge qatysyp, óner kórsetý men úshin úlken qurmet. Árine, sózsiz, bul osyndai mártebeli jobadaǵy kezdesý qýanyshy, tájiribemen almasýjáne «Astana Opera» teatry men elimizdi tanytý, - dep atap ótti Baqtiiar Adamjan.
Rýdolf Nýreevtiń mereitoiy qurmetine Memlekettik Kreml Saraiynyń sahnasynda daryndy bishige alǵys-rizashylyǵyn bildirý úshin álemdik balettiń sańlaqtary bas qosty. Kontsertte búgingi tańdaǵy erler klassikalyq biiniń úzdik ókilderi qatysty, olardyń qatarynda: Baqtiiar Adamjan (Astana Opera), Ivan Vasilev (Mihailovskii teatry), Semen Chýdin (Reseidiń Úlken teatry), Vadim Mýntagirov (Kovent-Garden), Denis Rodkin (Reseidiń Úlken teatry), Ksander Parish (Mariin teatr), Iakopo Tissi (Reseidiń Úlken teatry) bar, sonymen qatar olardyń názik jandy keremet áriptesteri de qatysty.
«Rýdolf Nýreev. Ótkennen bolashaqqa» – Andris Liepanyń «QOLTAŃBA men BEDEL» atty jyl saiynǵy jańa jobasynyń alǵashqy kontserti, osy is-sharanyń aiasynda kórermen qaýym esimderi máńgilikke tarih betterine engen HH ǵasyrdaǵy ataqty ártisterdiń shyǵarmashylyǵymen tanysty.
