Kóptegen bedeldi halyqaralyq baiqaýlardyń gran-pri iegeri, «Astana Opera» teatrynyń jetekshi solisi Baqtiiar Adamjan alǵash ret HH ǵasyrdaǵy kórnekti horeograf Rolan Petidiń qoiylymyndaǵy «Bozbala men ajal» baletindegi Bozbala basty rólin somdady.
Qoiylym aty ańyzǵa ainalǵan bishi ári horeograf Rýdolf Nýreevke arnalǵan Tributo a Rudolf Nureyev halyqaralyq gala-baleti aiasynda 28 shilde kúni bizdiń dáýirimizge deiingi I ǵasyrdan beri saqtalyp kele jatqan kóne rimdik amfiteatr, Spoleto (Italiia) Rim teatrynyń ashyq sahnasynda ótken bolatyn. Álemdik balet juldyzdarynyń oryndaýynda kórermenderge R. Nýreevtiń repertýarynan nómirler usynyldy.
Rolan Petidiń «Bozbala men ajal» bir bólimdi ataqty baleti 1946 jyly Iogann Sebastian Bahtyń Passakalia mýzykasyna qoiyldy, oǵan arqaý bolǵan Jan Koktonyń óleńmen jazylǵan librettosy. Gala-baletke arnap qoiylymdy júzege asyrǵan R. Petidiń assistenti – baletmeister Lýidji Bonino, ol ózi de bir kezderi Bozbalanyń partiiasyn oryndaǵan bolatyn. Baqtiiar Adamjannyń sahnadaǵy serigi bolǵan áigili milandyq La Skala teatrynyń prima-balerinasy Nikoletta Manni.
Budan bólek, Baqtiiar Adamjan osy keshte Vengriia memlekettik operasynyń primasy Tatiana Melnikpen L. Minkýstyń «Don Kihot» baletinen Pa-de-deni oryndady. Italiandyq kórermen qaýym B. Adamjannyń árbir sahnaǵa kóterilýin tolassyz qoshemetpen qarsy alyp, qazaqstandyq balet juldyzyn zor súiinishpen qabyldady.
