QR Syrtqy ister ministrliginiń resmi ókili Aibek Smadiiarov Bahreinde seksýaldy quldyqta bolǵan qazaqstandyq boijetkenderdiń elge qalai qaitarylǵanyn aityp berdi, dep habarlaidy "Ult aqparat".
«Esterińizde bolsa, bir apta buryn Bahreindegi seksýaldy quldyqtan Qazaqstannyń 21 azamatyn bosatyp alǵanymyzdy habarlaǵan edik. Bul jumys Bahreinniń quqyq qorǵaý organdary jáne Saýd Arabiiasynyń elshiligimen birge júrgizildi. Qazir ol qyzdar Qazaqstanda. Báriniń jaǵdaiy jaqsy. Búgingi kúni tergeý amaldary júrgizilip jatyr», - dedi Aibek Smadiiarov elordada ótken brifing barysynda.
Ol sonymen qatar qylmystyq toptyń quramynda Qazaqstan azamaty bolǵanyn da aityp ótti.
«Istiń mán-jaiyn tolyq aita almaimyn. Ol iske shetel azamattary ǵana emes, Qazaqstan azamattarynyń da qatysy bar. Olar dál osy ispen ainalysqan iri uiymdasqan qylmystyq top bolǵan. Tergeý aiaqtalyp, qajetti aqparat daiyn bolǵanda mindetti túrde ol týraly habarlaimyz», - dedi Aibek Smadiiarov.
