Joǵary bilim berýdiń barlyq deńgeileri boiynsha 2022-2023 oqý jylyna arnalǵan bilim berý granttaryn bólý tizimi jariialandy, dep habarlaidy QazAqparat.
Ǵylym jáne joǵary bilim ministrliginiń málimetinshe, granttardyń basym bóligi injenerlik, óńdeý, qurylys salalaryna bólingen, olardyń sany 17 794-ti quraidy.
«Al pedagogikalyq ǵylymdarǵa – 10 810 grant, aqparattyq-kommýnikatsiialyq tehnologiialar salasyna – 9 103 grant, jaratylystaný ǵylymdary, matematika jáne statistika baǵytyna 6 288 grant tiesili. Sondai-aq, tehnikalyq baǵyttarǵa erekshe nazar aýdarylyp, memlekettik tapsyrystyń úlesi 60%-ǵa deiin ulǵaidy. Bakalavriatqa 2022-2023 oqý jylynda 73 myńǵa jýyq grant bólindi», - dep jazdy vedomstvo.
Halyqtyń áleýmettik osal toptarynan shyqqan balalar úshin kvotalar sany artqan. Kóp balaly nemese tolyq emes otbasylardan shyqqan balalar, sondai-aq erekshe qajettilikteri bar balalardy tárbielep otyrǵan otbasylardaǵy talapkerler grant alý úshin kóbirek múmkindikterge ie bolady.
«Biyl alǵash ret Memleket basshysynyń tapsyrmasy boiynsha bilim berý grantynyń jańa túri anyqtaldy: «Halyqtyń tyǵyz ornalasqan jáne batys óńirleriniń jastarynyń jetekshi joǵary oqýoryndarynda oqýǵa arnalǵan maqsatty bilim berý granty» - Atyraý jáne Mańǵystaý oblystarynyń 10 myń talapkerine joǵary oqý oryndarynda bilim alý úshin maqsatty granttar alýǵa múmkindik beredi. Maqsatty «Atyraý-Mańǵystaý» grantyna konkýrsqa aǵymdaǵy jyldyń mektep túlekteri qatysa alady. Bul rette olar bir ýaqytta jalpy konkýrsqa, onyń ishinde «Serpin» baiqaýyna qatysa almaidy», - dep túsindirdi ministrlikten.
Ulttyq testileý ortalyǵynyń direktory Rýslan Emelbaevtyń málimetinshe, bilim granttary, onyń ishinde «Atyraý-Mańǵystaý» maqsatty grant sanynyń artýyna bailanysty búgin tizim jariialanǵan.
«Memleket basshysynyń tapsyrmasy boiynsha barlyq granttyń 60% tehnikalyq mamandyqtarǵa bólindi. Talapkerler berilgen aqparat negizinde durys tańdaý jasaidy dep senemin», – dedi ol.
Magistratýraǵa túsýge 13 myńnan astam, doktorantýraǵa túsýge 1800-den astam grant bólingen.
2022-2023 oqý jylyna arnalǵan bilim berý granttaryn bólýdiń tolyq tizimi Ǵylym jáne joǵary bilim ministrligi Ulttyq testileý ortalyǵynyń saitynda mynaý siltemeler boiynsha jariialanǵan:
