"Soiýz-FG" zymyran tasyǵyshynyń 11 qazanda apatqa ushyraýyna birinshi basqyshtaǵy D blogynda ornalasqan datchiktiń alty millimetrlik shtogy zaqymdanǵany sebep bolýy múmkin. RBK saitynyń apat sebebin tergeýden habary bar derekkózine silteme jasap habarlaýynsha, bul tetik Baiqońyrda zymyrandy qurastyrý kezinde zaqymdanǵan bolýy yqtimal. Bul aqparatty basylymǵa "Roskosmos" agenttigindegi derekkózi de rastady.
Komissiia tekserýiniń túpkilikti qorytyndysy men usynystary 30 qazan kúni jariialanady. Derekkóziniń aitýynsha, budan soń "Soiýz" zymyrany Halyqaralyq ǵarysh stantsiiasyna qaita ushyryla bastaýy múmkin.
"Roskosmos" agenttiginiń baspasóz qyzmeti tergeý aiaqtalǵansha "boljamdar men qaýesetterge" qatysty kommentarii berýden bas tartty.
Qazannyń 11-i kúni Baiqońyr ǵarysh ailaǵynan Halyqaralyq ǵarysh stantsiiasyna ushyrylǵan "Soiýz" zymyran tasyǵyshy áýege kóterilgennen birneshe minýttan soń apatqa ushyraǵan. Zymyran tasyǵyshqa tirkelgen "Soiýz MS-10" ǵarysh kemesi halyqaralyq stantsiiaǵa reseilik ǵaryshker Aleksei Ovchinin men amerikalyq astronavt Nik Heigti jetkizýi tiis bolǵan. Apattan soń ǵaryshkerler otyrǵan kapsýla Baiqońyrdan shamamen 500 kilometr qashyqtyqqa qonǵan.
