Reseide koronavirýsqa qarsy jappai vaktsina salýǵa "Spýtnik V" ekpesiniń ekinshi komponentiniń jetispeýi kedergi bolýy múmkin. Bul jóninde juma kúni "Medýza" saity habarlady. Munyń aldynda Reseide turǵyndarǵa koronavirýs vaktsinasyn salýǵa kedergi jasaityn birneshe másele, sonyń ishinde ony óndirýdegi qiyndyqtar týraly aitylǵan.
Reseide jappai vaktsina salýdyń 5 jeltoqsanda bastalatynyn apta basynda osy eldiń prezidenti Vladimir Pýtin aitqan. "Medýzanyń" málimeti boiynsha, qazir Reseide vaktsinanyń birinshi komponenti kóp óndirilgen, degenmen farmatsevtikalyq kompaniialar onyń ekinshi bóligin shyǵarýdy jolǵa qoia almai otyr. "Onsyz vaktsinatsiiany bastai berýge bolady, biraq aiaqtaý múmkin emes" dep jazady basylym.
"Medýzaǵa" aqparat bergen derekkózder - federaldyq deńgeidegi sheneýnik jáne farmatsevtika salasynyń ókili Reseidegi qoimalarda qazir "Spýtnik V" vaktsinasynyń 500 myńdai danasy ǵana bar ekenin aitqan. Vaktsinany araǵa birneshe apta salyp, eki ret egý kerek. Onyń birinshi komponentin óndirýde irkilis joq, tek ekinshi bóliginiń óndirisin jolǵa qoiýda qiyndyqtar bolyp jatyr. Derekkózder bul máseleniń bir jarym aidan soń sheshiletinin aitqan. Degenmen vaktsinany tek óndirip qana qoimai, onyń sapasyn da tekserý qajet bolady.
Munyń aldynda The Bell vaktsina óndirisin jappai jolǵa qoiý qiyn bolyp jatyr degen habar taratqan. Basylymǵa suhbat bergen adamdardyń aitýynsha, jyl sońyna deiin ekpeniń 500 myń dozasyn óndirý múmkin emes. Vaktsina óndirýmen ainalysyp jatqan bir kompaniia ókili "qysta shyǵarylatyn vaktsinanyń sany óte az bolady" degen.
Qarashanyń basynsha Resei prezidenti Vladimir Pýtin "Spýtnik V" vaktsinasyn óndirý boiynsha Frantsiia basshysy Emmanýel Makronnan kómek suraǵan. Makron bul máseleni ǵalymdarmen aqyldasýǵa ýaqyt surady degen aqpar boldy. Biraq bul resmi deńgeide rastalǵan joq.
- Resei densaýlyq saqtaý ministrligine qarasty Gamaleia ortalyǵy ázirlegen Covid dertine qarsy vaktsina 11 tamyzda tirkelgen. Bul – koronavirýstyń jańa túrine qarsy álemde jasalǵan alǵashqy vaktsina. Degenmen tirkeýge alǵan kezde ol klinikalyq synaqtyń tek eki kezeńinen ótken, iaǵni tek ondaǵan adamǵa ǵana synalyp kórgen. Keiin úshinshi synaq kezinde ekpeniń tiimdiligi 95 paiyz degen tujyrym jasaldy. Biraq synaq nátijesin táýelsiz túrde baǵalaǵandar bolǵan joq.
- Qazaqstan Reseidiń koronavirýsqa qarsy "Spýtnik V" vaktsinasyn jeltoqsanda óndirýdi bastap, kelesi jyly ony halyqqa jappai egýdi josparlap otyr. Bul jóninde 4 jeltoqsanda Qazaqstan prezidenti Qasym-Jomart Toqaev ákimshiligi málimdedi.
- Qazaqstanda Resei vaktsinasyn óndirý 22 jeltoqsanda bastalady, aldymen dárigerlerge, pedagogtarǵa jáne kúsh qurylymdarynyń qyzmetkerlerine ekpe salynady dedi premer-ministr Asqar Mamin. Prezidentke bergen málimetinde ol osy aida otandyq vaktsinanyń 2 mln dozasyn óndirý bastalatynyn da aitty.
- Qazaqstannyń Jambyl oblysynda koronavirýsqa qarsy qazaqstandyq vaktsina shyǵaratyn zaýyt salynyp jatyr. Quny 7 mlrd teńge bolatyn zaýyt keler jyldyń naýryz aiynda vaktsina shyǵara bastamaq. Bul jóninde 2 jeltoqsanda Jambyl oblysynyń ákimi Berdibek Saparbaev málim etken.
