Qazaqstandyq biznesmen, Qazaqstannyń Reseidegi elshisi Imanǵali Tasmaǵambetovtiń kúieýbalasy Keńes Raqyshev Reseidiń altyn óndiretin Petropavlovsk kompaniiasy iegerleriniń biri atandy, - dep habarlady Reuters agenttigi. BAQ 38 jastaǵy Keńes Raqyshev kásiporyn úlesin reseilik milliarder Viktor Vekselbergtiń Renova Group kompaniiasynan satyp alǵanyn habarlady.
Renova Group kompaniiasy Reuters agenttigine Petropavlovsk kompaniiasy aktsiiasynyń 22 paiyzyn satyp alý kelisimi aiaqtalǵanyn rastaǵanymen, onyń mán-jaiy týraly aitýdan bas tartqan.
«Interfaks» agenttigi Keńes Raqyshevtiń reseilik kompaniia aktsiiasyna ózi qadaǵalaityn kiprlik Fincraft Holdings Ltd. firmasy arqyly ie bolǵanyn habarlady.
Reuters-tiń málimetinshe, Petropavlovsk kompaniiasynyń naryqtaǵy kapitaly biyl 8 paiyzǵa (331 million dollarǵa deiin) ósken. Reseidegi eń iri altyn óndiretin kompaniialardyń biri sanalatyn Petropavlovsk-niń bas keńsesi Londonda ornalasqan. Kompaniia Reseidiń Qiyr Shyǵysy men Amýr oblysyndaǵy altyn kenishterin igeredi.
Qazaqstandyq Forbes jýrnaly Keńes Raqyshevtiń bailyǵyn 705 million dollarǵa baǵalaidy. Basylym málimetinshe, Raqyshev SAT & Company óndiristik holdingi aktsiiasynyń baqylaý paketine ie. Onyń Standard saqtandyrý kompaniiasynda, Central Asia Metals Plc metallýrgiialyq kompaniiasynda jáne tranzaktsiia qyzmetin kórsetetin NetElement kompaniiasynda úlesi bar. Raqyshev biyl Kazkommertsbanktegi 86,09 paiyz aktsiia paketin «Halyq bankine» 1 teńgege satqan.
Keńes Raqyshev ár jyldary Qazaqstan premer-ministri, qorǵanys ministri, Almaty ákimi, prezident ákimshiliginiń jetekshisi bolyp qyzmet atqarǵan 61 jastaǵy Imanǵali Tasmaǵambetovtiń qyzy Ásel Tasmaǵambetovaǵa úilengen. Tasmaǵambetova 2017 jyly aqpanda Qazaqstannyń Reseidegi elshisi bolyp taǵaiyndalǵan.
Azattyq
