Ońtústik Qazaqstan oblysynyń Qazyǵurt aýdanynda mal soiý, sút qabyldaý beketteri men qarqyndy baý ósirý jáne jemis jidek qabyldaý beketteri syndy jalpy 40 aýyl sharýashylyǵy óndiristik kooperativi qurylǵan. Onyń 19 ótken jyly qurylsa, al biyl 21 kooperativ qurylǵan. Búgin atalǵan kooperativterdiń jumysymen BAQ ókilderi oblys ákiminiń baspasóz qyzmeti uiymdastyrǵan press-týr kezinde tanysyp qaitty, dep habarlaidy QazAqparat.
Sondai kooperativterdiń biri Sharaphana aýyldyq okrýgine qarasty Mahambet Ótemisuly aýylyndaǵy «Qaratas» aýyl sharýashylyǵy óndiristik kooperativi. Ótken jyldyń sońynda qurylǵan sút sharýashylyǵymen ainalysatyn kooperativtiń búginde 117 múshesi bar.
Birikken kúsh biregei tabysqa jeteleitinin aitqan sharýalar kooperativke birigýdiń arqasynda memleketten tiisti qoldaý kómekter alyp, shaýashylyqtyń órisin keńeitip jatqanyn jetkizdi.
«Egistigimiz ben mal jaiylymdyq jerimiz yńǵaily bolǵandyqtan sút sharýashylyǵyn damytý boiynsha 117 usaq sharýashylyqty biriktirip kooperativ qurdyq. «Aýylsharýashylyǵyn qarjylai qoldaý qory» AQ arqyly 30 múshe 130 mln teńge kóleminde nesie aldy. Oǵan saýyndy 700 bastai iri qara mal alyp, olardan kúndigine 1 tonnadan astam sút alyp otyrmyz», - dedi «Qaratas» aýyl sharýashylyǵy óndiristik kooperativiniń tóraǵasy Maqsat Arapbaiuly.
Aldaǵy ýaqytta táýligine 3 tonna sút alýdy josparlap otyrǵan sharýalar quny 5 mln teńge bolatyn syiymdylyǵy eki tonnalyq modýldi sút qabyldaý beketin satyp alǵan. Onyń 50 paiyzy memleket tarapynan sýbsidiialanǵan. Sút saqtaýǵa arnalǵan tanker, arnaiy zerthana, tońazytqyshpen jabdyqtalǵan. Buǵan deiin, kooperativ sútti «FÝD MASTER» JShS-niń ornatqan syiymdylyǵy 1,2 tonnalyq tankerde saqtap kelgen.
Endi jańadan ornatylǵan modýldi sút qabyldaý beketiniń arqasynda sharýalardyń tabysy eselenip, aýdandaǵy sút óndirisin órkendetýge septigin tigizbek. Mundaǵy óndirilgen ónim «FÝD MASTER» seriktestigine mailylyǵana qarai litiri 80-85 teńgeden ótkizilip otyr.
Agrarly aimaqqa jatatyn taýly óńirdiń aýyl sharýashylyǵyn damytýǵa jylda erekshe nazar aýdaryp otyramyz degen aýdan ákimi Tólegen Telǵaraev ótken jyly aýyl sharýashylyq ónim kólemi 29 mlrd teńge bolsa, osy jyly 32 mlrd teńgege jetkizýdi josparlap otyr eken.
