Berlindegi "Sharite" klinikasynda jatqan reseilik oppozitsiialyq saiasatker Aleksei Navalnyi tolyq esin jidy. Bul týraly qupiia derekkózge súiengen The Insider, Bellingcat jáne Der Spiegel basylymdary habarlady. Olardyń jazýynsha, Navalnyi Tomskiden Máskeýge ushyp bara jatqan kezde iaǵni, ýlanardyń aldynda bolǵan oqiǵalardy esine túsire alýy múmkin.
Joǵaryda atalǵan basylymdardyń málimetinshe, Navalnyiǵa dáriger men áielinen basqa adamdardy da kirgize bastaǵan. Biraq saiasatkermen kezdesý úshin qatań kúzetten ótý kerek. Al saiasatkerdiń baspasóz hatshysy Kira Iarmysh maqalalardaǵy keibir jaittar ulǵaitylyp kórsetkenin jazdy.
Der Spiegel aqparat kóziniń aitýynsha, "Sharite" klinikasynda kúzet kúsheigen. Navalnyidyń esin jiǵany týraly aqparat shyqqannan keiin 9 qyrkúiekte keshke qarai saiasatker jatqan aýmaq qaýipsizdiktiń "eń joǵary deńgeii" rejimine kóshken. Aqparat kóziniń aitýynsha, Germaniianyń arnaiy qyzmeti tek qoqan-loqy ǵana emes, "Sharite" klinikasyn qaralaý siiaqty "jalǵan aqparattar legine" tótep berýge qamdanyp jatyr.
Dárigerlerdiń aitýynsha, Navalnyi fizikalyq turǵyda 90 paiyz qalpyna kele alady, al psihikasy tolyq qalypqa kelgen. Olar Ombyǵa ushaqty shuǵyl túrde qondyrý týraly sheshim qabyldaǵan ushqyshtyń jyldam reaktsiiasy men Navalnyiǵa atropin dárisin ekken jedel járdem qyzmetkerleriniń áreketi aman qalýyna qatty kómektesti dep otyr.
Buǵan deiin Die Zeit basylymy qupiia derekkózge súiene otyryp, Navalnyiǵa "Novichoktan" da qaýiptirek ý bergen, ony tek arnaiy jabdyqtalǵan zerthanada ǵana jasaýǵa bolady, sondyqtan bul operatsiiany reseilik FSB uiymdastyrǵan bolýy yqtimal dep jazǵan edi. Gazettiń málimetinshe, nemis biligi saiasatkerdi ańdyǵan arnaiy qyzmet ókili qaýipti zatty Navalnyi shái ishken keseniń jiegine nemese keseniń ózine shashyp ketken bolýy múmkin dep boljap otyr. Ýdyń qaldyqtary saiasatker sý ishken bótelkeniń aýzy men saiasatkerdiń qolynan da tabylǵan.
Nemis basylymynyń jazýynsha, ýdyń áser etý ýaqytyn eseptegen qylmyskerler Navalnyi Tomskiden Máskeýge qarai ushqan kezde jolda qaitys bolady dep shamalaǵan bolýy múmkin.
Reseilik oppozitsioner, Jemqorlyqpen kúres qorynyń jetekshisi 44 jastaǵy Navalnyi 20 tamyz kúni Tomskiden Máskeýge baǵyt alǵan ushaqta jaǵdaiy kúrt nasharlaǵan. Ushaq saiasatker densaýlyǵynyń nasharlaýyna bailanysty Omby qalasyna qonýǵa májbúr bolǵan. Saiasatker Omby aýrýhanasynda eki kún jatty. Ondaǵy dárigerler Navalnyidyń zat almasý protsesi buzylǵan dep málimdedi. Olar "saiasatker ýlandy" degen Navalnyi jaqtastarynyń tujyrymyn joqqa shyǵarǵan. Degenmen "Medýzanyń" jazýynsha, Ombyda saiasatkerdiń ýlanǵany "aidan anyq bolǵandyqtan" jedel járdem kóliginde oǵan atropin salǵan.
22 tamyzda týystary men jaqtastarynyń talabymen saiasatker Berlindegi "Sharite" klinikasyna aýystyryldy. Nemis dárigerleri zerthanada teksergennen keiin Germaniia úkimeti Aleksei Navalnyi quramy jaǵynan sovet odaǵy kezinde shyǵarylǵan áskeri "Novichok" ýyna uqsas zatpen ýlandy dep málimdedi.
Dúisenbi kúni nemis dárigerleri Navalnyidyń densaýlyǵy jaqsarǵanyn, komadan shyqqanyn habarlaǵan edi.
