Qyrymnyń Kerch qalasynda politehnikalyq kolledjge jasalǵan shabýyldan 18 adam qaza tapty. Bul týraly TASS agenttigi jedel áreket etý qyzmetine silteme jasap habarlady.
"Aldyn ala málimet boiynsha 18 adam qaza taýyp, 50 adam zardap shekti. Oqiǵa ornyna bes jedel járdem brigadasy jóneltildi" dep málimdedi Qyrym respýblikalyq apattyq meditsina ortalyǵynyń direktory Sergei Astankin.
Al, "KrymInform" agenttiginiń habarlaýynsha, qaza tapqandar sany on adamǵa deiin jetýi yqtimal. Aldyn ala málimet boiynsha, 70 adam jaralanǵan bolýy múmkin.
"Kerch Info" basylymy kolledjde gaz jarylǵanyn jazdy. "Krymgazset" mekemesiniń baspasóz qyzmeti ǵimaratqa gaz tartylmaǵanyn, biraq ol jerde gaz ballondary bolýy múmkin ekenin aitady.
Politsiia kúdikti retinde 20-25 jas shamasyndaǵy jigitke izdeý jariialady.
"360" telearnasy kýágerlerdiń sózine silteme jasap jarylys aldynda belgisiz adamnyń birinshi qabattyń terezesinen ishke qarai shólmek laqtyrǵanyn habarlaidy. "Kerch.FM" radiosy jarylys bolar aldynda ǵimaratta atys bolǵanyn jáne oqiǵany terakt dep sanaitynyn aitty. Keibir derek boiynsha, aýrýhanaǵa túskenderdiń barlyǵy mina jarylysynan jaralanǵan. Úiindi astynda 15 adamǵa deiin qalyp qoiǵan bolýy yqtimal. Ázirge bul aqparat resmi túrde rastala qoiǵan joq.
Tergeý komiteti jarylys faktisi boiynsha qylmystyq is qozǵady. RF Prezidentiniń baspasóz hatshysy Dmitrii Peskov lańkestik nusqasy da qarastyrylyp otyrǵanyn málimdedi.
"Interfaks" agenttiginiń habarlaýynsha, Tergeý komitetiniń resmi ókili Svetlana petrenko Kerchtegi kisi ólimine bailanysty qylmystyq is qozǵalǵanyn aitty.
Kerch qalasy Qyrymnyń shyǵysynda ornalasqan. Ol Qyrymdy Reseimen bailanystyrady. Máskeý Qyrymdy 2014 jyly kóktemde Ýkrainanyń reseishil prezidenti Viktor Ianýkovich halyq tolqýymen bilikten qulatylǵan soń basyp alǵan.
