Qazaqstan qorǵanys ministrligi Resei qorǵanys kúshteri bas shirkeýiniń qurylysyna qarjylai qoldaý kórsetti. Bul týraly 14 mamyrda qorǵanys saiasatyn úilestirý boiynsha Resei-Qazaqstan kelissózi kezinde Qazaqstan qorǵanys ministriniń orynbasary general-leitenant Múslim Altynbaev málimdedi, - dep jazady TASS agenttigi.
"Qazaqstannyń qorǵanys vedomstvosy Reseidegi bas áskeri shirkeý qurylysyna belgili bir somada qarjy aýdardy" dedi general-leitenant Altynbaev.
Naqty qansha aqsha aýdarylǵanyn qorǵanys ministriniń orynbasary ashyp aitqan joq.
Múslim Altynbaev munan soń Qazaqstanǵa Resei shirkeýine qaiyrymdylyq jasaýdan ne paida keletinin aitqan. Onyń sózinshe, 2019 jyldyń sáýirinde Qazaqstan biligi Máskeýge Ekinshi dúniejúzilik soǵysqa qatysqan qazaqstandyqtar týraly aqparat jibergen. "Olardyń esimderi bas áskeri shirkeýde máńgi saqtalady" dedi Altynbaev.
Resei áskeriniń bas shirkeýi eldegi eń iri dini keshenderdiń biri bolady dep josparlanǵan. Ony bilik Máskeý irgesindegi Kýbinka qalasynda Ekinshi dúniejúzilik soǵystaǵy jeńistiń 75 jyldyǵyna orai – 2020 jyly salyp bitýi tiis.
Resei qorǵanys ministrligi shirkeýdiń halyqtyń qaiyrymdylyqqa dep bergen qarjysyna salynyp jatqanyn aitqan.
Resmi statistika boiynsha, 2019-2021 jyldarǵa bekitilgen biýdjet boiynsha, biyl Qazaqstan qorǵanys ministrligine 315,9 milliard teńge bólingen. Bul soma 2021 jylǵa qarai 296,41 milliard teńgege azaiady.
