قازاقستان قورعانىس مينيسترلٸگٸ رەسەي قورعانىس كٷشتەرٸ باس شٸركەۋٸنٸڭ قۇرىلىسىنا قارجىلاي قولداۋ كٶرسەتتٸ. بۇل تۋرالى 14 مامىردا قورعانىس ساياساتىن ٷيلەستٸرۋ بويىنشا رەسەي-قازاقستان كەلٸسسٶزٸ كەزٸندە قازاقستان قورعانىس مينيسترٸنٸڭ ورىنباسارى گەنەرال-لەيتەنانت مٷسلٸم التىنباەۆ مەلٸمدەدٸ, - دەپ جازادى تاسس اگەنتتٸگٸ.
"قازاقستاننىڭ قورعانىس ۆەدومستۆوسى رەسەيدەگٸ باس ەسكەري شٸركەۋ قۇرىلىسىنا بەلگٸلٸ بٸر سومادا قارجى اۋداردى" دەدٸ گەنەرال-لەيتەنانت التىنباەۆ.
ناقتى قانشا اقشا اۋدارىلعانىن قورعانىس مينيسترٸنٸڭ ورىنباسارى اشىپ ايتقان جوق.
مٷسلٸم التىنباەۆ مۇنان سوڭ قازاقستانعا رەسەي شٸركەۋٸنە قايىرىمدىلىق جاساۋدان نە پايدا كەلەتٸنٸن ايتقان. ونىڭ سٶزٸنشە, 2019 جىلدىڭ سەۋٸرٸندە قازاقستان بيلٸگٸ مەسكەۋگە ەكٸنشٸ دٷنيەجٷزٸلٸك سوعىسقا قاتىسقان قازاقستاندىقتار تۋرالى اقپارات جٸبەرگەن. "ولاردىڭ ەسٸمدەرٸ باس ەسكەري شٸركەۋدە مەڭگٸ ساقتالادى" دەدٸ التىنباەۆ.
رەسەي ەسكەرٸنٸڭ باس شٸركەۋٸ ەلدەگٸ ەڭ ٸرٸ دٸني كەشەندەردٸڭ بٸرٸ بولادى دەپ جوسپارلانعان. ونى بيلٸك مەسكەۋ ٸرگەسٸندەگٸ كۋبينكا قالاسىندا ەكٸنشٸ دٷنيەجٷزٸلٸك سوعىستاعى جەڭٸستٸڭ 75 جىلدىعىنا وراي – 2020 جىلى سالىپ بٸتۋٸ تيٸس.
رەسەي قورعانىس مينيسترلٸگٸ شٸركەۋدٸڭ حالىقتىڭ قايىرىمدىلىققا دەپ بەرگەن قارجىسىنا سالىنىپ جاتقانىن ايتقان.
رەسمي ستاتيستيكا بويىنشا, 2019-2021 جىلدارعا بەكٸتٸلگەن بيۋدجەت بويىنشا, بيىل قازاقستان قورعانىس مينيسترلٸگٸنە 315,9 ميلليارد تەڭگە بٶلٸنگەن. بۇل سوما 2021 جىلعا قاراي 296,41 ميلليارد تەڭگەگە ازايادى.
