AQSh-tyń jańadan sailanǵan prezidenti Djo Baiden diplomatiia salasynda uzaq jyl tájiribesi bar Entoni Blinkendi memlekettik hatshy qyzmetine taǵaiyndaidy. 22 qarashada Amerikanyń kóptegen aqparat quraldary osylai dep habarlady.
Eger senat Blinken kandidatýrasyn maquldasa, ol Donald Tramptyń tórt jyl boiǵy “Birinshi kezekte Amerika” saiasatyn ózgertip, AQSh-tyń odaqtastary men básekelesterimen qarym-qatynastaǵy “túitkilderdi” sheship, qalpyna keltirýmen ainalysady.
Baiden 24 qarashada alǵashqy taǵaiyndaýlaryn habarlai bastaidy. Burynǵy memlekettik hatshy Hillari Klintonnyń kómekshisi Djeik Salivan Baidenniń ulttyq qaýipsizdik máseleleri boiynsha keńesshisi bolady dep aitylady.
Blinkenniń taǵaiyndalatynyn birinshi bolyp Bloomberg jazdy, izinshe qalǵan aqparat quraldary rastady.
Donald Tramptyń sailaý nátijesin jaramsyz etýge tyrysyp, bilik tranzitine kedergi jasaǵanyna qaramastan Baiden óziniń ákimshiligin jasaqtaýǵa kirisken. Burynǵy vitse-prezident 20 qańtarda inaýgratsiiasy ótkennen keiin sailaýshylar aldynda bergen ýádelerin oryndaýǵa birden kirisetinin aityp otyr. Ol osyǵan deiin koronavirýs indetimen kúreske basymdyq berip, ekonomikany saýyqtyrýǵa kóńil bólýge ýáde bergen. Baiden AQSh-tyń ǵalamdyq jylynýmen kúres týraly Parij kelisimi jáne Dúniejúzilik densaýlyq saqtaý uiymyna músheligin qaitaratynyn da jetkizgen.
Ol Blinkenniń kómegimen odaqtastarymen buzylǵan qarym-qatynasty qalpyna keltirip, Qytaimen ýshyqqan jaǵdaidy retteýge de kúsh salmaq.
