اقش-تىڭ جاڭادان سايلانعان پرەزيدەنتٸ دجو بايدەن ديپلوماتييا سالاسىندا ۇزاق جىل تەجٸريبەسٸ بار ەنتوني بلينكەندٸ مەملەكەتتٸك حاتشى قىزمەتٸنە تاعايىندايدى. 22 قاراشادا امەريكانىڭ كٶپتەگەن اقپارات قۇرالدارى وسىلاي دەپ حابارلادى.
ەگەر سەنات بلينكەن كانديداتۋراسىن ماقۇلداسا, ول دونالد ترامپتىڭ تٶرت جىل بويعى “بٸرٸنشٸ كەزەكتە امەريكا” ساياساتىن ٶزگەرتٸپ, اقش-تىڭ وداقتاستارى مەن بەسەكەلەستەرٸمەن قارىم-قاتىناستاعى “تٷيتكٸلدەردٸ” شەشٸپ, قالپىنا كەلتٸرۋمەن اينالىسادى.
بايدەن 24 قاراشادا العاشقى تاعايىنداۋلارىن حابارلاي باستايدى. بۇرىنعى مەملەكەتتٸك حاتشى حيللاري كلينتوننىڭ كٶمەكشٸسٸ دجەيك ساليۆان بايدەننٸڭ ۇلتتىق قاۋٸپسٸزدٸك مەسەلەلەرٸ بويىنشا كەڭەسشٸسٸ بولادى دەپ ايتىلادى.
بلينكەننٸڭ تاعايىندالاتىنىن بٸرٸنشٸ بولىپ Bloomberg جازدى, ٸزٸنشە قالعان اقپارات قۇرالدارى راستادى.
دونالد ترامپتىڭ سايلاۋ نەتيجەسٸن جارامسىز ەتۋگە تىرىسىپ, بيلٸك ترانزيتٸنە كەدەرگٸ جاساعانىنا قاراماستان بايدەن ٶزٸنٸڭ ەكٸمشٸلٸگٸن جاساقتاۋعا كٸرٸسكەن. بۇرىنعى ۆيتسە-پرەزيدەنت 20 قاڭتاردا يناۋگراتسيياسى ٶتكەننەن كەيٸن سايلاۋشىلار الدىندا بەرگەن ۋەدەلەرٸن ورىنداۋعا بٸردەن كٸرٸسەتٸنٸن ايتىپ وتىر. ول وسىعان دەيٸن كوروناۆيرۋس ٸندەتٸمەن كٷرەسكە باسىمدىق بەرٸپ, ەكونوميكانى ساۋىقتىرۋعا كٶڭٸل بٶلۋگە ۋەدە بەرگەن. بايدەن اقش-تىڭ عالامدىق جىلىنۋمەن كٷرەس تۋرالى پاريج كەلٸسٸمٸ جەنە دٷنيەجٷزٸلٸك دەنساۋلىق ساقتاۋ ۇيىمىنا مٷشەلٸگٸن قايتاراتىنىن دا جەتكٸزگەن.
ول بلينكەننٸڭ كٶمەگٸمەن وداقتاستارىمەن بۇزىلعان قارىم-قاتىناستى قالپىنا كەلتٸرٸپ, قىتايمەن ۋشىققان جاعدايدى رەتتەۋگە دە كٷش سالماق.
