Almatyda ishki ister ministrligi akademiiasynda kýrsanttyń denesi tabyldy. Bul týraly 22 jeltoqsanda "Ýralskaia nedelia" basylymy jazdy. Oqiǵaǵa bailanysty "sýitsidke itermeleý" baby boiynsha qylmystyq is qozǵalǵan. Marqumnyń anasy basylymǵa "oqý ornyna qajet zattardy satyp alý úshin ata-analar men stýdentter arasynda aqsha jinaý qalypty qubylys" ekenin jetkizgen. Ol ulynyń keiingi kezde jii aqsha surap ketkenin aitqan.
"13 jeltoqsanda Almatydaǵy IIM akademiiasy ashanasynyń qosalqy bólmesinen 19 jastaǵy Salamat Ótegenov darǵa asylǵan kúii tabyldy. Onyń moinyn arqannan bosatqan kezde tiri bolǵan, biraq jedel járdem brigadasy qutqara almady. Ol Almaty ýaqyty boiynsha 16:52 shamasynda qaitys boldy" dep jazdy basylym.
Stýdenttiń anasy Bekzat Imanǵalieva bireýler ulyn ózine qol jumsaýǵa itermelegen nemese óltirip ketken dep sanaidy. Onyń sózine qaraǵanda oqý bastalǵannan keiin ata-analar arasynda aqsha jinaý bastalǵan. Birde ata-analardyń WhatsApp-taǵy chatyna árbir ata-ana 50 myńnan berýi tiis degen habarlama túsken.
"Biz sol kezde ne úshin 50 myń jinaýǵa tiispiz dep tańǵalǵanbyz. Oqýǵa attanar kezde Salamatqa qajet barlyq zattardy satyp áperdik, shyn máninde kamýfliaj, aiaq kiim, formany memleketke qaraityn akademiianyń ózi qamtamasyz etýi tiis edi. Odan keiin bizden taǵy 50 myń teńge surady. Bir qyzyǵy, buǵan biz ǵana tańǵaldyq. Qalǵan kýrsanttardyń ata-anasy muny qalypty nárse dep qabyldady. Keiinirek bul aqshanyń kazarmaǵa kir jýǵysh mashina, útik, turmystyq tehnika satyp alý úshin jinalǵany belgili boldy" deidi Imanǵalieva.
Onyń aitýynsha, qarasha aiynda uly "qar jinaityn kúrek pen ózge nárseler satyp alý úshin" ata-anasynan aqsha suraǵan. Basylym WhatsApp-taǵy chattardan skrinshot salǵan.
Akademiia ákimshiligi 22 jeltoqsanda basylymǵa hat joldap, oqiǵaǵa bailanysty Qylmystyq kodekstiń 105-bap, 1-bóligi ("Ózine qol jumsaýǵa itermeleý") boiynsha sotqa deiingi tergeý amaldary bastalǵanyn habarlaǵan. Biraq "qyzmettik tekseris kezinde kýrsanttar men akademiia qyzmetkerleriniń zańsyz áreketi anyqtalmady" degen. Akademiia "aqsha jinaý" týraly aqparatqa jaýap bermegen.
