الماتىدا ٸشكٸ ٸستەر مينيسترلٸگٸ اكادەميياسىندا كۋرسانتتىڭ دەنەسٸ تابىلدى. بۇل تۋرالى 22 جەلتوقساندا "ۋرالسكايا نەدەليا" باسىلىمى جازدى. وقيعاعا بايلانىستى "سۋيتسيدكە يتەرمەلەۋ" بابى بويىنشا قىلمىستىق ٸس قوزعالعان. مارقۇمنىڭ اناسى باسىلىمعا "وقۋ ورنىنا قاجەت زاتتاردى ساتىپ الۋ ٷشٸن اتا-انالار مەن ستۋدەنتتەر اراسىندا اقشا جيناۋ قالىپتى قۇبىلىس" ەكەنٸن جەتكٸزگەن. ول ۇلىنىڭ كەيٸنگٸ كەزدە جيٸ اقشا سۇراپ كەتكەنٸن ايتقان.
"13 جەلتوقساندا الماتىداعى ٸٸم اكادەميياسى اسحاناسىنىڭ قوسالقى بٶلمەسٸنەن 19 جاستاعى سالامات ٶتەگەنوۆ دارعا اسىلعان كٷيٸ تابىلدى. ونىڭ موينىن ارقاننان بوساتقان كەزدە تٸرٸ بولعان, بٸراق جەدەل جەردەم بريگاداسى قۇتقارا المادى. ول الماتى ۋاقىتى بويىنشا 16:52 شاماسىندا قايتىس بولدى" دەپ جازدى باسىلىم.
ستۋدەنتتٸڭ اناسى بەكزات يمانعاليەۆا بٸرەۋلەر ۇلىن ٶزٸنە قول جۇمساۋعا يتەرمەلەگەن نەمەسە ٶلتٸرٸپ كەتكەن دەپ سانايدى. ونىڭ سٶزٸنە قاراعاندا وقۋ باستالعاننان كەيٸن اتا-انالار اراسىندا اقشا جيناۋ باستالعان. بٸردە اتا-انالاردىڭ WhatsApp-تاعى چاتىنا ەربٸر اتا-انا 50 مىڭنان بەرۋٸ تيٸس دەگەن حابارلاما تٷسكەن.
"بٸز سول كەزدە نە ٷشٸن 50 مىڭ جيناۋعا تيٸسپٸز دەپ تاڭعالعانبىز. وقۋعا اتتانار كەزدە سالاماتقا قاجەت بارلىق زاتتاردى ساتىپ ەپەردٸك, شىن مەنٸندە كامۋفلياج, اياق كيٸم, فورمانى مەملەكەتكە قارايتىن اكادەمييانىڭ ٶزٸ قامتاماسىز ەتۋٸ تيٸس ەدٸ. ودان كەيٸن بٸزدەن تاعى 50 مىڭ تەڭگە سۇرادى. بٸر قىزىعى, بۇعان بٸز عانا تاڭعالدىق. قالعان كۋرسانتتاردىڭ اتا-اناسى مۇنى قالىپتى نەرسە دەپ قابىلدادى. كەيٸنٸرەك بۇل اقشانىڭ كازارماعا كٸر جۋعىش ماشينا, ٷتٸك, تۇرمىستىق تەحنيكا ساتىپ الۋ ٷشٸن جينالعانى بەلگٸلٸ بولدى" دەيدٸ يمانعاليەۆا.
ونىڭ ايتۋىنشا, قاراشا ايىندا ۇلى "قار جينايتىن كٷرەك پەن ٶزگە نەرسەلەر ساتىپ الۋ ٷشٸن" اتا-اناسىنان اقشا سۇراعان. باسىلىم WhatsApp-تاعى چاتتاردان سكرينشوت سالعان.
اكادەمييا ەكٸمشٸلٸگٸ 22 جەلتوقساندا باسىلىمعا حات جولداپ, وقيعاعا بايلانىستى قىلمىستىق كودەكستٸڭ 105-باپ, 1-بٶلٸگٸ ("ٶزٸنە قول جۇمساۋعا يتەرمەلەۋ") بويىنشا سوتقا دەيٸنگٸ تەرگەۋ امالدارى باستالعانىن حابارلاعان. بٸراق "قىزمەتتٸك تەكسەرٸس كەزٸندە كۋرسانتتار مەن اكادەمييا قىزمەتكەرلەرٸنٸڭ زاڭسىز ەرەكەتٸ انىقتالمادى" دەگەن. اكادەمييا "اقشا جيناۋ" تۋرالى اقپاراتقا جاۋاپ بەرمەگەن.
