Prodiýser Baian Alagózova depýtattyqqa úmitker bolyp jatqan jieni, ánshi ári telejúrgizýshi Asha Mataiǵa qatysty qoǵamda aitylyp jatqan syn-pikirlerge jaýap berdi, dep habarlaidy ult.kz.
Áleýmettik jelidegi videomálimdemesinde ol Asha Mataidyń búgingi jetistikterine óz eńbegimen jetkenin aityp, óner adamdarynyń saiasatqa kelýine qarsy kózqarasty synǵa aldy.
"Zańger, muǵalim, dáriger depýtat bola alady da, nege ártis depýtat bola almaidy? Basqalardan zańdy, biýdjettiń qalai bólinetinin surap kerek emes te, tek mádeniet salasynyń adamdarynan suraý kerek pe? Nege eldiń bári ánshiler men ártisterdi depýtattyqqa laiyqsyz dep sanaidy?", - dedi Baian Alagózova.
Prodiýserdiń sózinshe, áleýmettik jelidegi syn men jaǵymsyz pikirler Asha Mataidyń psihologiialyq jaǵdaiyna áser etip, oǵan aýyr tiip jatqan kórinedi.
"Qazir oǵan óte aýyr. Ol osy jolda jalǵyz ózi qalǵandai bolyp otyr. Men ony báribir jaqsy kóremin jáne qoldaimyn. Depýtat bolsa da, bolmasa da - ol men úshin laiyqty adam. Ol názik áiel, eki balanyń anasy", - dedi ol.
Sonymen qatar Baian Alagózova áielderdiń qoǵamdaǵy orny men turmystyq zorlyq-zombylyq máselesine de toqtaldy. Onyń aitýynsha, ózi kóp jyldan beri eki reabilitatsiialyq ortalyqtyń jumysyn qoldap keledi jáne áielderdiń quqyǵyn qorǵaý baǵytynda eńbek etip júr. Prodiýserdiń pikirinshe, qoǵamda áielderge qatysty eski kózqaras áli de tolyq ózgergen joq.
