"Qazaqstan prezidenti ákimshiligi basshysynyń burynǵy orynbasary Baǵlan Mailybaev eki aiǵa qamaldy", - dep habarlaidy "Ult aqparat" Ulttyq qaýipsizdik komitetiniń (UQK) baspasóz qyzmetine silteme jasap.
Resmi málimet boiynsha, UQK Baǵlan Mailybaev pen prezident ákimshiliginiń burynǵy taǵy bir qyzmetkeri Nikolai Galihindi 12 qańtarda "Memlekettik qupiiany zańsyz jinap, taratý jáne jariialaý" aiyby boiynsha ustaǵan. Nikolai Galihin buǵan deiin prezident ákimshiliginde ishki saiasat bólimi meńgerýshisiniń orynbasary bolǵan.
Al 14 qańtar kúni Astananyń Esil aýdandyq soty Mailybaev pen Galihindi 2 aiǵa qamaýǵa alý týraly sanktsiia shyǵaryp, kúdiktiler UQK-niń tergeý abaqtysyna jabylǵan.
Kúdiktilerdiń turatyn jerinde tintý jasalyp, zattai aiǵaqtar tárkilengen. UQK qazir tergeý jumystary júrip jatqanyn jáne onyń nátijesi boiynsha qosymsha habarlanatynyn aitady.
Baǵlan Mailybaev prezident ákimshiligi basshysynyń jetekshisi qyzmetinen 12 qańtar kúni bosatylǵan.
