QR Bas prokýratýrasynyń Quqyqtyq statistika jáne arnaýly esepke alý komitetiniń tóraǵasy Baǵdat Mýsin jeke kýálikten, júrgizýshi kýáliginen jáne kóliktiń tehnikalyq pasportynan bas tartyp, onyń barlyǵyn telefondaǵy qosymshaǵa aýystyrýdy usyndy. Bul týraly ol Qazaqstan Prezidenti janyndaǵy Memlekettik basqarý akademiiasyndaǵy sózinde aitty, - dep habarlaidy kaz.tengrinews.kz.
"Zańdy tulǵanyń memlekettik tirkeýge turǵany jaily qyzǵyl tústi kýálik bolatyn. Jyljymaityn múliktiń memlekettik tirkeýge qoiylǵany jaily da kýálik boldy. Endi olar qazir joq. Qazir qandai da bir málimet kerek bolǵan jaǵdaida, bazaǵa kirip qarai alasyń. Men jeke kýálik, júrgizýshi kýáligin, sondai-aq, kóliktiń tehnikalyq pasporty siiaqty qujattardy alyp tastaýdy usynamyn", - dedi Baǵdat Mýsin.
Onyń aitýynsha, osy qujattardy shyǵarýda únemdei otyryp, elimizdegi búkil halyqty smartfondarmen qamtamasyz etýge bolady.
"Qazaqstandyqtar ózimen birge uialy telefonnan basqa eshteńe ustamaidy. Osy qujattardyń árqaisysyn shyǵarǵannan góri ár turǵynǵa smartfon alyp bergen arzanǵa túsedi. Smartfonnyń óz baǵasy 5-10 myń teńge. Solardy óz baǵasymen alatyn bolsaq, árbir adamǵa smartfon alyp berýge bolady. Biraq endi MAI qyzmetkerlerine adamdar uialy telefony sónip qaldy dep aitpas úshin ózimen birge batareialar alyp júrýge týra keledi. Sóitip ol "mine, saǵan batareia" dep aitady, - dep ázildedi Mýsin.
Sonymen qatar, Baǵdat Mýsin memlekettik organdarda smartfondar qoldanýǵa tyiym salýǵa qarsy ekenin aityp ótti. Onyń aitýynsha, aqparattyq qaýipsizdikpen qamtamasyz etýdiń basqa da ádisteri bar.
