Media-sarapshy Baǵdat Qojahmetovtiń pikirinshe, koronavirýs pandemiiasyn álige deiin jeńe almai kelgenimizge biliktegi jemqorlyq kináli. Jumyssyzdyqtyń artýyna da, ekonomika damýynyń tejelýine de osy faktor negizgi sebep. Bul pikirin ol «Nur Otan» partiiasy jaqtastarynyń zoom-konferentsiiasynda aitty.
Búgin saiasattanýshy Erlan Sairov zoom-konferentsiia ótkizdi. Taqyryby «Elimizdegi áleýmettik-saiasi jaǵdai. «Nur Otan» partiiasynyń praimerizi elimizde evoliýtsiialyq ózgerister jasaýǵa baǵyt».
«Qoǵam retinde, memleket retinde ártúrli syn-qaterge, kez-kelgen indetke, qoǵamnyń problemalaryn sheshýge daiyn bolýymyz kerek. Onyń barlyǵy úsh baǵyttaǵy máselege kelip tireledi. Ol úsh másele de bizdiń elde qazir sheshilmei otyr. Birinshisi – bilim berý. Bilim joq jerde mádeniet joq, mádeniet joq jerde densaýlyq joq. Bilim joq jerde zań da jumys istemeidi, halyq ta aýyrady. Ekinshisi – densaýlyq saqtaý. Bul sala da aqsap tur. Bilim berý men densaýlyq saqtaý salasyn rettemesek bári beker. Qoǵamdaǵy eń abyroily mamandyq – muǵalim men dáriger bolýy tiis», - deidi ol.
Al, osy eki máseleniń týyndaýyna sebep bolatyn "basty másele – jemqorlyq" deidi Qojahmetov. Qazirgi koronavirýsty jeńe almai otyrýymyzǵa da osy «dert» sebep kórinedi.
«Bizdegi problemalardyń kóbiniń artynda jemqorlyq tur. Koronavirýsty álige deiin jeńe almaýymyzǵa da sol sebep. Biz pandemiiany áiteýir jeńemiz, biraq bolashaqta budan da basqa problemalarmen betpe-bet kelýimiz ábden múmkin. Sondyqtan oǵan daiyn bolýymyz kerek», - deidi Baǵdat Qojahmetov.
Aita keteiik, biyl maýsym aiynda qurylǵan «Nur Otan» partiiasy jaqtastary ligasy músheleri zoom-konferentsiia ótkizip, eldegi áleýmettik-saiasi jaǵdaidy talqylady. Oǵan «Nur Otan» partiiasynyń hatshysy Arman Qyryqbaev, saiasattanýshylar Aidos Sarym men Qazbek Maigeldinov, jýrnalister Baǵdat Qojahmetov, Aidos Juqanuly, Rahat Jaqsybai, blogerler Iakov Fedorov, Bibigúl Dáýletbekqyzy, Samat Nurtaza qatysty.
