Aqtóbe oblysynyń ákimi Berdibek Saparbaev kóktemgi sý tasqynynan zardap shekkenderdiń barlyǵyna kómektesýge ýáde berdi, - dep habarlaidy "Ult aqparat" Aqtóbe oblysy ákiminiń baspasóz qyzmetine silteme jasap.
Oblys basshysy óńirde bolyp jatqan jaǵdaiǵa bailanysty qysqa merzimdi eńbek demalysyn úzgen bolatyn.
Búgin ol Mahambet, Kirpishti aýyldary men baý-baqsha ujymdarynyń aǵymdaǵy jaǵdaiymen tanysyp, Elek, Sazdy ózenderiniń saǵasyn qarap shyqty.
Berdibek Saparbaev saiajai alqaptary turǵyndaryn tyńdap, úilerin aralap shyqty.
- Jaǵdai ońai emes. Bul tek Aqtóbede ǵana emes, Qazaqstandaǵy birneshe óńirlerdi de ainalyp ótken joq. Bul ýaqytsha qiyndyqtar, kishkene sabyr etý qajet. Bizdiń mindetimiz – osy máseleniń sheshilýine barynsha at salysý. Eń bastysy – dúrlikpei, birlese otyryp bir-birimizdi qoldaýymyz tiis. Eshkim nazardan jáne járdemnen tys qalmaidy, biraq kórsetiletin kómektiń barlyǵy zań aiasynda bolady. Keltirilgen shyǵyndy anyqtap, sý tasqyny saldaryn boldyrmaý sharalaryn júrgizetin qalalyq komissiia qurylǵan bolatyn. Komissiia árbir otbasymen jeke-jeke jumys jasap, olardyń materialdyq jaǵdaiyn qarastyra, shyǵyndaryn baǵalaidy. Biraq, ol úshin quqyq belgileýshi qujattar qajet. Komissiia árbir úi boiynsha naqty sheshim qabyldaityn bolady,-dedi oblys ákimi áńgime barysynda.
Sonymen qatar, óńir basshysy №40 jáne Qarǵaly orta mektepterindegi ýaqytsha ornalastyrý beketterine de bardy. munda 500-den asa adam bar, olardyń 200-i balalar.
Eske sala keteiik, Aqtóbede jergilikti aýqymdaǵy tabiǵi sipattaǵy tótenshe jaǵdaiy jariialanǵan bolatyn.
Óńirde saiajailardaǵy 597 úi men aýlany sý basyp, 1510 adam qaýipsiz jerlerge kóshirildi, 69-y qutqaryldy. Adamdardy sý basqan oryndardan kereýet, kórpe-tósek, ystyq taǵamdary bar ýaqytsha kóshirý oryndaryna ornalastyrýda. Orta mektepter janynan 7 beket ashyldy. Onyń tórteýine 832 adam ornalastyrylsa, 325-i balalar.
