Memlekettik qyzmettiń «B» korpýsynyń laýazymyna ornalasýǵa úmitkerlerge «Qaztest» júiesi boiynsha qazaq tilinen test ótkizý josparlanǵan. Bul jaiynda Májilis depýtattarynyń saýalyna QR Premer-Ministriniń jaýabynda aitylǵan, dep habarlaidy QazAqparat.
«Qazaqstan Respýblikasyndaǵy til týraly» Zańynda (budan ári – Zań) memlekettik tildiń qoǵamdyq qatynastardyń barlyq salalarynda, onyń ishinde memlekettik basqarýda qoldanylýynyń quqyqtyq negizderi bekitilgen. Ony oqyp-úirený men damytý úshin jaǵdai týǵyzý jónindegi mindetter aiqyndalǵan. Zańnyń 23-babynyń 3-tarmaǵyna sáikes memlekettik tildi belgili bir kólemde jáne biliktilik talaptaryna sáikes bilýi qajet kásipterdiń, mamandyqtardyń jáne laýazymdardyń tizbesi Qazaqstan Respýblikasy zańdarymen belgilenedi»,- dedi Úkimet basshysy.
Onyń atap ótýinshe, memlekettik tildiń keń aýqymdy qoldanysyn qamtamasyz etýge baǵyttalǵan Qazaqstan Respýblikasyndaǵy til saiasatyn iske asyrýdyń 2020-2025 jyldarǵa arnalǵan memlekettik baǵdarlamasy júzege asyrylýda.
«Baǵdarlama aiasynda memlekettik qyzmettiń «B» korpýsynyń laýazymyna ornalasýǵa úmitkerlerge «Qaztest» júiesi boiynsha shekti mán belgilei otyryp, testileýden ótkizýdi engizý josparlanǵan», - dedi Asqar Mamin.
