Ulttyq akkreditteý ortalyǵy akkreditteýdiń jańa baǵyttaryn engizip otyr. Standarttaý jáne akkreditteý salasyndaǵy jańashyldyqtar týraly onlain brifing barysynda Almaty Ulttyq akkreditteý ortalyǵy ókildiginiń basshysy Viktor Tomasevich aityp berdi, dep habarlaidy QazAqparat.
Búgingi tańda ulttyq akkreditteý ortalyǵy akkreditteýdiń jańa shemalaryn engizý úshin agroónerkásiptik keshen, meditsina jáne menedjment júiesi salasynda jumystar júrgizip jatyr. Bul osy salalarda jyl saiyn kórsetiletin qyzmetterdiń ósýine bailanysy jáne soǵan qarai sáikestikke baǵalaý júrgizý qajettiligi týyndaidy.
«Saýda ortalyqtary men dúkenderdegi sórelerde «Halal» tańbasy bar ónimder óte kóp. Ónimge tańbalaýdy «Halal» sertifikattaý jónindegi organdar salady. Keibir jaǵdailarda óndirýshilerdiń ózi uqsas belgini qoiady. Qazirgi ýaqytta Qazaqstanda eki ulttyq standart qabyldandy, biraq sertifikattaý organdaryn úilestirý úshin zańnamanyń bolmaýyna bailanysty el aýmaǵyndaǵy kez kelgen kásiporyn ózderiniń bilimi men iskerligin negizge ala otyryp, «Halal» standarttary boiynsha jumys istei alady», dep habarlady Viktor Tomasevich.
Sonymen qatar, ol Qazaqstanda «Halaldy» úshinshi taraptyń rastaýynsyz derbes sertifikattaýdy júzege asyratyn bes uiym bar ekenin jetkizdi.
«Biz akkreditteý úshin áleýeti bar zerthanalyq bazaǵa sholý jasadyq. Qazirgi ýaqytta akkredittelgen sýbektiler tiziliminde 175 zerthana bar, olar Kedendik Odaqtyń (TR KO 021/2011) 021 tehnikalyq reglamenti jáne tamaq ónimderin sertifikattaýdyń 49 organy boiynsha tamaq ónimderine taldaý júrgizedi. Akkredittelgen zerthanalar arasynda 37 zerthananyń DNQ-ny sáikestendirý úshin taldaý júrgizý múmkindigi bar», - tolyqtyrdy spiker.
Onyń aitýysha, oganikalyq ónim salasy da mańyzdy. Bizdiń elde organikalyq ónim óndiriledi, biraq ony sertifikattaýdy sheteldik organdar júzege asyrady. Qazir Qazaqstanda atalǵan ónimdi baǵalaý júiesi qurylyp jatyr.
