Astanada qyzmettik mindetin atqarý kezinde qaza tapqan feldsher Uldana Myrzýannyń ólimine qatysty sot protsesi jalǵasyp jatyr, dep habarlaidy ult.kz.
Sot otyrysynda marqumnyń eks-kúieýi Ádilet Zeinel qaiǵyly jaǵdaidan qalai habardar bolǵanyn aityp berdi.
Onyń sózinshe, oqiǵa bolǵan kúni ekeýi jumysqa birge barǵan. Saǵat 10:00 shamasynda Uldana zardap shekken adamdy aýrýhanaǵa jetkizý úshin ketken. Osydan keiin ol habarlamalarǵa jaýap bermei qoiǵan.
Shamamen 50 minýttan keiin Ádilet Zeinelge telefon shalyp, Uldananyń qabyldaý bóliminde jatqanyn habarlaǵan. Alaida ol bastapqyda bul aqparatty ázil dep qabyldaǵanyn aitty. Keiin tómen túsip, marqum áieliniń denesin ózi tanyǵan.
Sotta Zeinel sondai-aq 19 qarashada Uldananyń ápkesimen birge ákimdikke barǵanyn aityp berdi. Onyń sózinshe, sol jerde máslihat depýtaty marqumnyń otbasyna 20 million teńgeni qolma-qol bergen.
Alaida bul aqshaǵa qatysty eshqandai qujatqa qol qoiylmaǵanyn málimdedi.
Aita keteiik, Uldana Myrzýan 2025 jylǵy 8 qarashada Astanada turǵyn úidiń syrtqy qaptamasy opyrylǵan jerge jedel járdem brigadasymen barǵan. Qutqarý jumystary kezinde ǵimarattan konditsioner qulap, feldsher aýyr jaraqat alǵan. Ol 10 kún jansaqtaý bóliminde jatyp, 18 qarashada kóz jumdy.
Qazir is Astananyń qylmystyq ister jónindegi aýdanaralyq sotynda qaralyp jatyr. Sotta oqiǵanyń mán-jaiy men oǵan jaýapty tulǵalardyń áreketine quqyqtyq baǵa berilmek.
