Týrizm jáne sport ministri Erbol Myrzabosynov Astanada ulttyq quramanyń qorytyndy oqý-jattyǵý jiynynda sportshylarǵa XX jazǵy Aziia oiyndaryndaǵy altyn medal úshin qansha syiaqy tólenýi josparlanyp otyrǵanyn aitty, dep habarlaidy ult.kz.
Vedomstvo basshysynyń sózinshe, Memleket basshysynyń tapsyrmasyna sáikes sportshylardy qosymsha yntalandyrý baǵytynda jumys júrgizilip jatyr. Atap aitqanda, Aziia oiyndarynda júlde alǵan sportshylarǵa beriletin syiaqy kólemin edáýir arttyrý kózdelýde.
Onyń aitýynsha, tiisti tapsyrma óńirlerge berilgen. Osyǵan bailanysty jýrnalister syiaqy mólsheri qansha bolatynyn surady.
«Bul normany zańnamalyq turǵyda engizý boiynsha jumys istep jatyrmyz. Buǵan deiin sportshylar 5, 10 nemese 15 myń dollar kóleminde syiaqy alatyn. Endi altyn medal úshin 50 myń dollar tóleýdi josparlap otyrmyz. Alaida dál osy Aziia oiyndarynda syiaqy biýdjetten tys qarajat esebinen beriledi. Qazir bul baǵytta tiisti jumystar júrgizilip jatyr. Rasynda, Aziia oiyndaryndaǵy altyn medaldiń mańyzy óte joǵary. Aziia qurlyǵynda básekesi óte myqty quramalar men elder bar. Sondyqtan altyn medal jeńip alý ońai emes», - dedi ol.
Aita keteiik, XX jazǵy Aziia oiyndarynda sporttyń 35 túrinen 570-nen astam otandyq sportshy synǵa túsedi. Týrizm jáne sport ministri Ulttyq quramanyń birqatar kóshbasshysynyń esimin atady.
Qurama sapyna dziýdodan Olimpiada chempiony Eldos Smetov endi. Sondai-aq Qazaqstan atynan semserlesýden álem chempiondary Rýslan Qurbanov, Kirill Prohodov, Erlik Sertai jáne Vadim Sharlaimov óner kórsetedi.
Qatysýshylar qatarynda Aziia chempiony Irina Bakaldina, qylyshtasýdan Aigerim Sarybai, Anastasiia Gýlik jáne Karina Dospai, sondai-aq Artem Sarkisian, Nazarbai Sattarhan men Nurmuhammed Jailybai bar.
Ústel tennisinen Qazaqstan sapynda Kirill Gerasimenko, Alan Qurmanǵaliev jáne Sarvinoz Mirkadirova baq synaidy.
Ministrdiń aitýynsha, jalpy ulttyq qurama sapynda 570-ten astam sportshy bolady.
