Qazaqstan komandasynyń tý ustaýshylary, konkishi Ekaterina Aidova men short-trekshi Abzal Ájiǵaliev Beijiń Olimpiadasynyń ashylý saltanatynda tarihi obrazben boi kórsetti. Olar Saq patshaiymy Tomiris pen qazaq batyrynyń keipinde el aldyna shyǵady, - dep habarlaidy Olympic.kz.
Komandanyń tý ustaýshylary kietin kiimge negizinen qazaqtyń ulttyq oiý-órnegi «qoshqar múiiz» beinelengen. Aita ketelik, órnek elementterin dizainerler Ábilhan Qasteev atyndaǵy Memlekettik óner murajaiymen birlesip daiyndady. Tokio-2020 Olimpiadasynda da osyndai qadam jasalǵan bolatyn.
Al Japoniiadaǵy jazǵy oiyndarǵa tý ustaýshylardyń kiimin tikken dizainer-modeler Violetta Ivanova Beijiń Olimpiadasy tý ustaýshylarynyń da formasyn daiyndady.
«Tý ustaýshylardyń kostiými óz eliniń dástúri men mádenietin pash etedi, sondyqtan, bizdiń basty maqsatymyz da osy boldy. Qazaq halqynyń erkin rýhyn urpaqtan urpaqqa jalǵasyp kele jatqan bai tarihynan artyq eshteńe beinelei almaityny anyq. Qazaqtyń batyrlary men Tomiris patshaiymy týraly ańyzdardy biz de, barsha álem de biledi. Kostiýmdi daiyndaý kezinde osy bir qyzyqty oqiǵalardy basty nazarǵa aldym», - deidi dizainer.
«Órnektiń negizinde barsha álem halyqtary ejelden qurmetteitin, eń myqty energiia kózi sanalatyn kún jatyr. Bul tek myqtylarǵa – jeńimpazdarǵa baǵyttalǵan. Bizdiń basty batyrlarymyz – sportshylar, olimpiadashylar tártipke berik, maqsaty anyq, óz armandaryna senimdi qadam basqan, bala kúninen beri basty maqsatyna jetý úshin eńbektengen jandar», - dep atap ótti ol.
Qazaqstandyq modelerdiń aitýynsha, oiynnyń ashylý saltanatyna arnalǵan formany daiyndaý qiynǵa soqqan. Sebebi, jumys kezinde klimattyq erekshelikterdi de eskerý qajet.
Áiel adamǵa arnalǵan kostiým palto jáne qolmen órnektelgen biregei sáýkeleden turady. Bul kostiýmdi qazaqstandyq sheberler 3 ai boiy, árbir santimetrin óz qolymen daiyndaǵan. Kóptegen antikalyq avtorlardyń shyǵarmalarynda kezdesken ári myńdaǵan jyldar boiy ańyzǵa ainalǵan Saq patshaiymy osy týyndyǵa arqaý bolǵan.
Áiel adam kostiýmindegi «qoshqar múiiz» órnegi qorshaǵan ortamen úilesim tapqan, ómirge talpynǵan, qunarlylyq pen molshylyqty beineleidi. Er adamnyń kostiýmindegi negizi element – qalqan erlik pen batyrlyqtyń simvoly. Eki kostiýmniń de astary tereń. Basty tús bolyp qara jáne «jeńimpazdardyń túsi» sanalatyn altyn tús tańdaldy. Qara sý jolbarysynyń jyly da esepke alyndy. Óitkeni, Olimpiadanyń bastalýy tap osy jyldyń enýimen sáikes kelip otyr.
Qazaqstandyq atletter kostiýmniń tolyq kóńilden shyǵatynyn kiimdi ólshegen sátten-aq aityp keledi. Eske salaiyq, Abzal Ájiǵaliev ekinshi Olimpiada qatarynan elimizdiń tý ustaýshysy atanyp otyr.
«Bizdiń kostiýmderimiz biregei ári rasymen de myqty energetika seziledi. Mundai mańyzdy sát Ekaterina ekeýmizge senip tapsyrylǵanyna qýanyshtymyn. El namysyn Olimpiadada qorǵaý úlken abyroi, al týyńdy alyp shyǵý arqyly jaýapkershilik odan ári arta túsedi. Bul sezimdi jetkizý múmkin emes!», - deidi Abzal Ájiǵaliev.
Eskizden bastap sońǵy syrýǵa deiingi protsess úsh aiǵa sozyldy. Bul óner týyndysyn daiyndaýǵa 20-dan asa sheber jumyldyryldy, onyń ishinde 2 konstrýktor, 4 tiginshi, sýretshi jáne 8 kesteshi bar. Kiimdi bezendirip turǵan barlyq keste altyn, kúmis jiptermen jáne monshaqtarmen qoldan jasaldy.
«Kostiýmderdiń eskizi Olimpiadanyń ashylý saltanatyna deiin qupiia ústaldy. Sondyqtan, kostiýmniń qandai bolatyny men úshin erekshe qyzyq edi. Kostiýmniń keremet shyǵatynyna kúmánim bolǵan joq. Alaida, bul kostiým men oilaǵannan da artyq daiyndalypty! UOK pen osy bir sulýlyqty qoldan jasaǵan barlyq sheberlerge úlken alǵysymdy bildiremin. Barlyq jan-dúniesin salyp istegen dúnie ekeni sezilip tur. Qazaqstandy osyndai deńgeide tanytý úshin budan asqan ne oilap tabý kerektigin bilmeimin», – dedi Ekaterina Aidova.
Aita ketelik, Olimpiada oiyndarynda sporttyń 8 túrinen 34 sportshy baq synaidy.
