QR Densaýlyq saqtaý ministri Ajar Ǵiniiat Atyraý oblysynyń Óńirlik kommýnikatsiialar qyzmetinde ótken baspasóz máslihatynda aimaqtaǵy meditsina mamandarynyń tapshylyǵyna túsinik berdi, dep habarlaidy QazAqparat.
«Halyq únine qulaq asatyn memleket» jobasynyń aiasynda ministrlik janynan úlken joba júrip jatyr. Osy 2 aidyń ishinde 1000-nan astam suraq kelip tústi. Onyń ishinde Atyraý oblysynan da keldi. Eń kóp kóterilgen másele bala men ana densaýlyǵyna bailanysty boldy. Sondyqtan da búgingi jumys josparynyń basty baǵyty osy máselege arnalyp otyr. 5 kún ishinde osy jerde respýblikalyq komissiia jumys istedi. Barlyq jaǵdailar jan-jaqty tekserildi», - dedi Ajar Ǵiniiat.
Ministrdiń pikirinshe, kadrlar máselesi sapaly meditsinalyq kómekti qamtamasyz etý úshin negizgi ról atqarady.
«Atyraý oblysynyń densaýlyq saqtaý salasynda 8 myńnan astam meditsina qyzmetkeri, sonyń ishinde 2 myńnan astam dáriger, 6 myńnan astam orta meditsina qyzmetkerleri jumys isteidi. Oblys boiynsha dáriger tapshylyǵy – 201 shtat. 2020 jyly joǵary oqý oryndarynan 70-ten astam dáriger, 2021 jyly 65 dáriger kelse, biyl 52 dáriger kelýi kózdelip otyr. Iaǵni, búgingi tapshylyqty osy túlekterdiń esebinen jabýǵa bolatyn edi. Biraq kóptegen dárigerler, jumys istep júrgen jergilikti dárigerlerdiń kóbi jeke meditsinaǵa ketip jatyr eken. Bul bir jaǵynan qarajatqa bailanysty. Ekinshi jaǵynan sońǵy jyldary densaýlyq saqtaý salasynda bolǵan kóptegen jaǵdailarǵa bailanysty jaýapkershiliktiń tym joǵary bolýynan jeke klinikalarǵa ketip jatqany taǵy bar», - dedi ministr.
