Ázerbaijanda myńdaǵan meditsina qyzmetkeri vaktsina alyp, eshqaisysy da densaýlyq jaǵdaiyna shaǵymdanǵan joq. Bul týraly Veli Ahýndov atyndaǵy meditsinalyq profilaktika ǵylymi-zertteý institýtynyń direktory Adil Allahverdiev málim etti, dep habarlaidy QazAqparat.
A. Allahverdievtiń sózinshe, vaktsinalardyń barlyǵynyń da jetilmegen jaqtary bolýy múmkin. Sondai-aq, olar júieli jáne naqty bir máselege bailanysty bolady.
«Júieli túrdegi janama áserleri - dene qyzýy, álsizdik, bulshyqet aýyrýy jáne t.b. Jergilikti áser - bul vaktsina egilgen jerdegi qyzarý, aýyrsyný. Qazirdiń ózinde 60 myńnan astam meditsina qyzmetkeri vaktsina aldy. Baqylaý jumystary kórsetkendei, adamdarda kúrdeli asqynýlar baiqalmaǵan. Men ózim vaktsina aldym. Dostarym siiaqty eshqandai shaǵymym joq», - dedi ǵylymi-zertteý institýtynyń basshysy.
Dáriger Túrkiiada da, Ázerbaijanda da vaktsina alǵandar arasynda koronavirýsty qaita juqtyrý jaǵdailary bolmaǵanyn atap ótti. Búgingi kúnge deiin Ázerbaijanda qoldanylatyn «Coronovac» vaktsinasynyń tiimsizdigi týraly eshqandai aqparat joq.
A.Allahverdiev budan buryn aitqanyndai, Ázerbaijanǵa jetkizilgen qytailyq «Coronavac» vaktsinasy joiylǵan COVID-19 virýsynan jasalǵan.
«Bul vaktsinanyń eń úlken artyqshylyǵy - ekpeden keiingi kez-kelgen aýrý belgileriniń baiqalmaýynda. Taǵy bir artyqshylyǵy - vaktsinany saqtaýǵa yńǵaily», - dep sendirdi sarapshy.
Ázerbaijan Ministrler Kabineti janyndaǵy Jedel shtabtyń málimeti boiynsha, ótken táýlikte elde taǵy 191 adam koronavirýs infektsiiasyn juqtyrǵan. 226 adam saýyǵyp ketkenimen, 3 adam qaitys bolǵan. Búgingi kúnge deiin elde koronavirýs juqtyrǵan 231 840 adam tirkeldi. Onyń 3173-i qaitys boldy.
