QR Qarjy ministri Baqyt Sultanov Ázerbaijannyń halyqaralyq bankine investitsiialanǵan zeinetaqy qorynyń milliardtaǵan qarjysy qalai qaitarylatynyn aitty, dep habarlaidy Sputnik Qazaqstan tilshisi.
Búgin májiliste depýtat Vladislav Kosarev ministrden Ázerbaijannyń halyqaralyq bankine investitsiialanǵan zeinetaqy qory qarjysynyń taǵdyry ne bolyp jatqanyn surady.
"Biz ol qarajatty joǵaltqan joqpyz. Bank bankrottyqqa ushyrap, kreditorlardyń kópshiligi qaryzdy qaita qurylymdaý týraly sheshimdi qoldamaǵan jaǵdaida osyndai qaýip bolar edi. Búginde banktiń bul obligatsiialary Ázerbaijannyń memlekettik baǵaly qaǵazdaryna aiyrbastaldy. Nátijesinde qaryzdy qaitarý merzimi 15 jylǵa uzartyldy. 250 million dollar 3,5 paiyzdyq stavkamen tólenedi. Sondyqtan, biz qarajattan aiyryldyq dep aitýǵa bolmaidy. Árine, bastapqy investitsiialaý shartymen salystyrǵanda aiyrmashylyq bolady. Biraq, negizgi aqshany biz joǵaltqan joqpyz", — dep jaýap berdi Sultanov.
Óz kezeginde Ulttyq bank tóraǵasynyń orynbasary Alpysbai Ahmetov qaryzdy qaitarý shyǵynsyz bolmaitynyn moiyndady.
"Ázerbaijan halyqaralyq banki óz qundy qaǵazdaryn 8,5 paiyzdyq stavkamen on jylǵa shyǵarǵan bolatyn. Qazir olar memlekettik baǵaly qaǵazdarǵa aýystyrylǵan kezde 3,5 paiyzdyq stavkaǵa deiin tómendedi. Árine, túsim azaidy, shyǵyn bar. Biraq zeinetaqy qorynyń qarajaty saqtalyp qaldy", — dedi ol.
Eske sala ketsek, biyl jazda zeinetaqy qorynda úlken daý-damai shyqty. Salymshylardyń 71,6 milliard teńgesi Ázerbaijannyń bankrot bolǵan halyqaralyq bankine investitsiialanǵany málim boldy. Bul oqiǵadan keiin qordaǵy milliardtaǵan qarjynyń saqtalýyna qoǵam alańdaýshylyq bildirdi. Al keibir ekonomister mundai aqylǵa qonymsyz sheshimge tańdanysyn jasyrmady.
Qazaqstandyqtardyń zeinetaqysyna ázerbaijandyq banktiń baǵaly qaǵazdaryn satyp alý týraly sheshim Ulttyq bankke Qairat Kelimbetov jetekshilik etken jyldary qabyldanǵan. Sondyqtan bolar úkimet ony Biryńǵai jinaqtaýshy zeinetaqy qorynyń direktorlar keńesine qaitarady. Keiin Kelimbetov ázerbaijandyq bankke salynǵan qarjyny tolyq qaitaratynyn málim etti. Biraq oǵan deiin Ulttyq bank tóraǵasy Daniiar Aqyshev bank qaryzyn qaita qaraýdyń úsh joly usynylǵanyn, úsheýi de shyǵynsyz bolmaitynyn aitqan edi.
