Parlament Májilisiniń depýtaty, «Aq jol» partiiasynyń tóraǵasy Azat Perýashev Qostanai óńirine sapary aiasynda «Qazaq tulpary» jylqy zaýytyna baryp, seriktestik basshylyǵymen kezdesti.
«Qazaq tulpary» JShS-nyń direktory Dias Qońyrshin atqarylǵan jumystar jóninde aityp, aldaǵy josparlarymen bólisti. Onyń aitýynsha, kásiporyn Qostanai tuqymyn damytyp, ári qarai jetildirý úshin investorlar tapqan eken, endi Aýyl sharýashylyǵy ministrligi aqshalai qarajat bólý joldaryn qarastyrýda.
«Qazaq tulpary» JShS jumysymen tanysqan Azat Perýashevqa mekeme basshysy birqatar máseleler men kedergiler týraly aitty.
– Buǵan deiin barlyq jaǵdai jasalyp kelgen edi. Qarjylai kómek te kórsetilgen. Ókinishke orai, onyń barlyǵy toqtady. Nege? Ol jaǵyna toqtalǵym kelmeidi. Aýyl sharýashylyq salasynda durys jumys jasalmaǵan. Biraq, áleýet bar bizde. Qazirgi ýaqytta baǵdarlama boiynsha 3 asyl tuqymdy jylqyny satyp almaqpyz, – dedi mekeme basshysy.
Májilis depýtaty óz kezeginde qazaq jylqysyna tek soǵym retinde ǵana qaramaý kerektigin tilge tiek etti.
— Qostanai jylqysy joiylý aldynda tur. Nebáry 20 mln teńgege asyl tuqymdy jylqylardy qalai ósirýge bolady? «Qazaq tulpary» – bizdiń brend. Ózge elderde osy baǵytta jumys isteitin bildei bir ministrlikter bar. Bizde qostanai jylqysyn saqtap qalýmen ainalysyp otyrǵan sizder ǵana, – dedi Perýashev.
.jpeg)