Adamzat ómirine eleýli áser etken jańalyqtar Uly Dala keńistiginde kóptep kezdesedi. Elbasynyń «Uly dalanyń jeti qyry» atty maqalasyna orai Parlament Májilisiniń depýtaty Azat Perýashev osylai pikir bildirdi, dep habarlaidy QazAqparat tilshisi.
«Bul maqala ulttyq ustanymǵa ári sanaǵa qatysty tyń serpin beretin mindetterdi qamtyp otyr. Ókinishke qarai, biraz býyndar boiy biz ózimizdiń tarihymyzdy, ótken ǵasyrlardy tek qaiǵyly jaǵynan ǵana este saqtap, osyndai kózqarasty qalyptastyrdyq. Buǵan qatysty tarihi sebepter de az emes. Osy oraida halqymyz asharshylyq, saiasi qýǵyn-súrgin, soǵys aýyrtpalyǵy sekildi náýbetti kezeńderdi basynan ótkerdi. Elbasy maqalasynda bizge tarihi pozitivizmge jol kórsetip otyr, iaǵni ata-babalarymyz adamzattyń damýyna eleýli yqpal etkendigine nazar aýdardy», - dep toqtaldy depýtat.
Bul turǵyda A. Perýashev atqa miný mádenieti men jylqy sharýashylyǵynyń damýyna qatysty bizdiń óńirdiń jetistigi orasan zor ekenin atap ótti.
«Prezident maqalasynda bul taqyrypqa egjei-tegjeili toqtalyp ótti. Negizi, jylqy sharýashylyǵyna qatysty bizdiń babalarymyz tarihi mańyzdylyǵy bar jańalyqty ashty», - dedi ol.
Depýtattyń paiymynsha, búginde jas býynnyń Batys órkenietine elikteýi jii kezdesedi. Sáikesinshe, osy damyǵan elderde qalyptasqan ádistemelerge úiretý úrdisi qalyptasty.
«Bul da durys shyǵar, biraq adamzat ómirine eleýli áser etken jańalyqtar Uly Dala keńistiginde de kóptep kezdesedi. Sondyqtan Memleket basshysy tereńde jatqan tarihymyzda eldiń eńsesin kóteretin faktiler az emes ekenine ekpin qoiyp otyr. Sebebi bizdiń óńir jańa tehnologiialardy shyǵarýǵa úles qosqan. Sondyqtan bizdiń jas býynnyń qanynda innovatsiiaǵa, jańalyqtarǵa qabileti bar ekenin keńinen aitýymyz kerek. Búginde bizdiń jas ǵalymdardyń ashqan jańalyqtary damyǵan elderdegi úrdisten esh kem emes», - dedi Azat Perýashev.
