Foto: videodan kadrlar
Taldyqorǵanda Aizat Jumanovanyń ólimine qatysty aldyn ala sot tyńdaýy ótti. Aiyptaý tarapynyń málimetinshe, áielin azaptap óltirdi dep tanylǵan kúieýi Janbolatqa qatysty aiyptaý aktisi sotta oqyldy, dep habarlaidy Ult.kz Stan.kz saityna silteme jasap.
Prokýrordyń aitýynsha, janjal 2025 jyldyń maýsymynda bastalǵan. Janbolat áieliniń telefonyna habarlama kelip jatqanyn kórip, qyzǵanyshpen onyń smartfonyn syndyryp tastaǵan. Aizat ta onyń telefonyn syndyrǵan. Osydan keiin erli-zaiypty shamamen eki apta sóilespegen.
Prokýrordyń sózine qaraǵanda, janjal birneshe kúnnen keiin taǵy qaitalanyp, 22 maýsym kúni qandy oqiǵaǵa ulasqan. Mas kúidegi kúdikti fizikalyq kúshi basym ekenin paidalanyp, Aizatqa birneshe ret soqqy jasap, aýyr jaraqat keltirgen. Áieli esinen tanǵannan keiin ǵana jedel járdem shaqyrǵan.
34 jastaǵy Aizat Jumanova aýrýhanaǵa aýyr halde jetkizilip, jansaqtaý bóliminde kóz jumdy.
Marqumnyń týystary sotta kúdiktiniń áreketi týraly óz boljamdaryn aitty. Olar Aizattyń denesindegi jaraqattarǵa qarap, ony attyń jalyna bailap súiregen bolýy múmkin dep oilaǵan. Degenmen sot-meditsinalyq saraptama bul nusqany rastamady.
Sýdia Ádilet Baqytov protsesstiń ashyq ótetinin aitty, biraq aiyptalýshy taraptyń qarsylyǵyna bailanysty BAQ-qa ázirge kúdiktini foto-videoǵa túsirýge tyiym salyndy.
Kelesi sot otyrysy 5 jeltoqsanda ótedi.
Eske sala keteiik, bul qylmys 2025 jyldyń maýsymynda Jetisý oblysy, Aqsý aýdany Balasaz aýylynda bolǵan. Aizat Jumanova 2 jasar qyzynyń kózinshe qatygezdikpen soqqyǵa jyǵylyp, kóz jumǵany habarlanǵan. Kúieýi bastapqyda áiel «selfi jasap jatyp terezeden qulap ketti» dep aqtalmaq bolǵan.
