فوتو: ۆيدەودان كادرلار
تالدىقورعاندا ايزات جۇمانوۆانىڭ ٶلٸمٸنە قاتىستى الدىن الا سوت تىڭداۋى ٶتتٸ. ايىپتاۋ تاراپىنىڭ مەلٸمەتٸنشە, ەيەلٸن ازاپتاپ ٶلتٸردٸ دەپ تانىلعان كٷيەۋٸ جانبولاتقا قاتىستى ايىپتاۋ اكتٸسٸ سوتتا وقىلدى, دەپ حابارلايدى Ult.kz Stan.kz سايتىنا سٸلتەمە جاساپ.
پروكۋروردىڭ ايتۋىنشا, جانجال 2025 جىلدىڭ ماۋسىمىندا باستالعان. جانبولات ەيەلٸنٸڭ تەلەفونىنا حابارلاما كەلٸپ جاتقانىن كٶرٸپ, قىزعانىشپەن ونىڭ سمارتفونىن سىندىرىپ تاستاعان. ايزات تا ونىڭ تەلەفونىن سىندىرعان. وسىدان كەيٸن ەرلٸ-زايىپتى شامامەن ەكٸ اپتا سٶيلەسپەگەن.
پروكۋروردىڭ سٶزٸنە قاراعاندا, جانجال بٸرنەشە كٷننەن كەيٸن تاعى قايتالانىپ, 22 ماۋسىم كٷنٸ قاندى وقيعاعا ۇلاسقان. ماس كٷيدەگٸ كٷدٸكتٸ فيزيكالىق كٷشٸ باسىم ەكەنٸن پايدالانىپ, ايزاتقا بٸرنەشە رەت سوققى جاساپ, اۋىر جاراقات كەلتٸرگەن. ەيەلٸ ەسٸنەن تانعاننان كەيٸن عانا جەدەل جەردەم شاقىرعان.
34 جاستاعى ايزات جۇمانوۆا اۋرۋحاناعا اۋىر حالدە جەتكٸزٸلٸپ, جانساقتاۋ بٶلٸمٸندە كٶز جۇمدى.
مارقۇمنىڭ تۋىستارى سوتتا كٷدٸكتٸنٸڭ ەرەكەتٸ تۋرالى ٶز بولجامدارىن ايتتى. ولار ايزاتتىڭ دەنەسٸندەگٸ جاراقاتتارعا قاراپ, ونى اتتىڭ جالىنا بايلاپ سٷيرەگەن بولۋى مٷمكٸن دەپ ويلاعان. دەگەنمەن سوت-مەديتسينالىق ساراپتاما بۇل نۇسقانى راستامادى.
سۋديا ەدٸلەت باقىتوۆ پروتسەسستٸڭ اشىق ٶتەتٸنٸن ايتتى, بٸراق ايىپتالۋشى تاراپتىڭ قارسىلىعىنا بايلانىستى باق-قا ەزٸرگە كٷدٸكتٸنٸ فوتو-ۆيدەوعا تٷسٸرۋگە تىيىم سالىندى.
كەلەسٸ سوت وتىرىسى 5 جەلتوقساندا ٶتەدٸ.
ەسكە سالا كەتەيٸك, بۇل قىلمىس 2025 جىلدىڭ ماۋسىمىندا جەتٸسۋ وبلىسى, اقسۋ اۋدانى بالاساز اۋىلىندا بولعان. ايزات جۇمانوۆا 2 جاسار قىزىنىڭ كٶزٸنشە قاتىگەزدٸكپەن سوققىعا جىعىلىپ, كٶز جۇمعانى حابارلانعان. كٷيەۋٸ باستاپقىدا ەيەل «سەلفي جاساپ جاتىپ تەرەزەدەن قۇلاپ كەتتٸ» دەپ اقتالماق بولعان.
