Azamattyq sektor aýyl ákimderin sailaý ideiasyn qoldaýy tiis. Bul týraly «Qoǵam jáne memleket: «Birgemiz» - 30 jyldyq seriktestik pen damý» atty IX Azamattyq forýmnyń jalpy otyrysynda QR Memlekettik hatshysy Qyrymbek Kósherbaev aitty, dep habarlaidy QazAqparat tilshisi.
«Elimizdiń úkimettik emes uiymdary jaýapty azamattyq qoǵamdy damytýdyń jáne saiasi júieni demokratiialandyrý shartynyń óte mańyzdy baǵyty retinde Memleket basshysynyń Joldaýynda belgilengen shynaiy jergilikti ózin ózi basqarýdy damytýǵa belsendi qatysýǵa tiis ekendigine senimdimiz. ÚEU-lar men azamattyq belsendiler jergilikti ózin ózi basqarý tujyrymdamasyn ázirleý jáne damytýǵa barynsha belsendi túrde qatysýy kerek. Kelesi jyldan bastap elimizde aýyldyq eldi mekenderdiń ákimderin sailaý bolady. Bul ideianyń azamattyq sektordan qoldaýǵa ie bolýy, alǵashqy kúnnen bastap-aq jergilikti ózin ózi basqarýdyń úzdik tájiribesin júzege asyrýymyz, aýyldyq ákimderdiń naqty jaýapkershiligi men eseptiligin qamtamasyz etýimiz mańyzdy. Tórtinshi deńgeili biýdjetter tujyrymdamasynyń jumys isteýi, aýyldar men eldi mekender derbes biýdjetke ie bolýy, jergilikti jerde qalatyn salyq túrlerine durys arqa súiei alýy mańyzdy», - dedi Memlekettik hatshy.
Sonymen qatar ol adamdar jergilikti biýdjettiń qalai qalyptasatyndyǵyn, olardyń oryndalýyn sailanǵan ákimnen qalai talap etý kerektigin, ákimderdiń qalai sailanatyndyǵyn, damý baǵdarlamalarynyń oryndalý barysyn baqylaýdy jaqsy túsinýi qajet ekendigin basa aitty.
«Árbir turǵyn jergilikti bilikten durys jer saiasatyn, jumys berýshiden taza jalaqyny, meditsinalyq jáne áleýmettik saqtandyrý qoryna tólemderdi talap etýi qajet. Óz aýylynyń, aýdanynyń, qalasynyń ómirin jaqsartý jaiynda oilaýy tiis», - dedi Qyrymbek Kósherbaev.
.jpeg)