Jaqynda “Qazaqstan” ulttyq arnasynan “Áiel syry” degen baǵdarlamany kózim shalyp qaldy. Júrgizýshiler men shaqyrylǵan qonaqtar arasynda “azamattyq neke” jaily pikirtalas júrip jatyr eken.
Azamattyq nekeni “neke” dep aitýdyń ózi durys emes dep oilaimyn. “Azamattyq kelisim” degen jón bolar. Pikirtalas barysynda efirge habarlasqan jastardyń birazy “azamattyq nekeniń” durys emestigin, oǵan qarsy ekendikterin bildirdi. Bul, árine, qýanarlyq jaǵdai. Habar basynda, ózi on jyldan asa ýaqyt azamattyq kelisimmen turmys quryp, 2 balasy bar ekendigin, ókinbeitinin aitqan basty keiipkerdiń ózi onyń durys emestigine kóz jetkizip oilanyp qaldy. Iá, túsingen adamǵa Allanyń aldynda nekesiz turmys qurý zina (oinas)bolyp sanalady. Eki jas Allanyń úiinde, imamnyń nekeni qiiýy arqyly zańdy erli-zaiypty atanýy kerek.
Baǵdarlamanyń qonaǵy, belgili ánshi Qudaibergen Bekishov azamattyq nekege túk te qarsylyǵy joq ekenin ashyq aitty. Halyq bolyp qurmettep júrgen aǵamyzdyń bul sózi jastarǵa qandai úlgi bolmaq? Júrgizýshi Qudaibergen aǵamyzǵa “Ulyń azamattyq nekemen úilense qarsy bolmaisyń ba?” degende ǵana aǵamyz oilanyp qaldy.
Sondaǵy oiyma kelgeni, osy bizdiń halyq aldynda júrgen adamdarymyzdyń deni “alǵa jyljýymyz kerek, damýymyz kerek, búitýimiz kerek, súitýimiz kerek...” dep asyra siltep jibergen joq pa eken? Endi uldarymyz “azamattyq nekemen” úilenip alyp, bir jyldan keiin “myna qyz maǵan bolmaidy eken, basqasyn alam” degenge kóz jumýymyz qaldy ma? Jetpegeni osy ma edi? Onsyz da elimizde jylyna 50 myń otbasy ajyrasyp jatyr emes pe?
Árkim óziniń oiyn ashyq aitýǵa quqyly, degenmen milliondaǵan kórermeni bar ulttyq arnamyz talqylanatyn taqyryptarǵa, shaqyrylatyn qonaqtarǵa erekshe mán berse deimiz. Jastardyń sanasyn ýlaityn pikirlerden aýlaq bolǵanymyz abzal.
Bedelhan JANPEIISTEGI,
Alakól aýdany,
Úsharal qalasy,
Almaty oblysy
"Jas Alash" gazeti
