Azamattyq qoǵamnyń alǵashqy nyshany

Almatyda ótken H Azamattyq forým úkimettik emes uiymdar men memlekettik organdardyń ózara árekettestiginiń jańa baǵyttaryn talqylap, úlken megapolistegi mańyzdy máselelerdi birlese sheshý jolyn talqylaýdy maqsat tutty. «Bolashaǵymyz birlikte» degen uranmen ótken Azamattyq forýmnyń basty taqyryby Elbasy N.Nazarbaevtyń bes institýtsionaldyq reformasyn júzege asyrýdaǵy ÚEU-nyń rólin  kórsetýge arnaldy.

Qoǵamdaǵy ár adamnyń belsendiligi men nemquraily bolmaýynan kóp másele sheshimin tabady. Ol úshin ár azamat sergektik tanytyp, ÚEU kóteretin túrli bastamalarǵa azamattyq qoldaý bildirip, áleýmettik janjaldardy azaitý úshin jaǵdailar jasaýǵa, túrli áleýmettik toptardyń jumysyna janashyrlyqpen qaraýǵa, qoǵamdyq institýttardyń qatynas­taryn úilestirýge járdem berip úirengeni abzal.

Qazaqstan halqy Assambleiasynyń múshesi, Almaty qalasyndaǵy korei ulttyq ortalyǵy tóraǵasynyń orynbasary G.Kan Elbasynyń «100 naqty qadam» Ult josparyndaǵy 4-qadamǵa orai, azamattyq birtutastyqty qalyp­tastyrýdaǵy qoǵamdyq uiymdar­dyń rólin atap kórsetti. G.Kannyń, ásirese, «árbir jeke adam men áleýmettik top­tardyń memlekettik tildi meńgerýimen birge qoǵamda kúrdeli bolyp kórinetin kóp másele birden oń sheshimin tabar edi» degen pikirine forýmǵa qatysýshylar qyzý qoldaý bildirdi.

Azamattyq forýmdy uiym­das­tyrǵan Almaty qalasy Ishki saiasat basqarmasynyń basshysy Nurlan Sy­dyqov jiyn bastalar aldyn­daǵy kirispe sózinde: «Forýmnyń Táý­elsizdiktiń 25 jyldyǵy qarsańynda ótip otyrǵany biz úshin mańyzdy. Onynshy ret ótkizilip otyrǵanynyń ózi – Almatydaǵy aza­mattyq qoǵamnyń belsendiliginiń aiǵaǵy. Respýblikamyz boiynsha 20 000 ÚEU tirkelgen bolsa, onyń 600-ge jýyǵy Almaty qalasyna tiesili. Azamattyq sektor – bul memleket pen turǵyndar arasyndaǵy altyn kópir» dep atap ótti. Qalalyq máslihattyń depýtaty Konstantin Avershin senbi, jeksenbi kúnderi «Qalany qardan tazalaiyq!» atty aktsiia uiymdastyryp, ózi restorator bolǵandyqtan, basqa áriptesterine ún qatyp, qolyna kúrek ustap, qar kúreýge shyqqan barlyq eriktilerdi ystyq aspen qamtamasyz etken.

H Azamattyq forýmnyń aiasynda qoǵamdyq mańyzy bar jáne áleýmettik irgeli isterdi júzege asyrýda erekshe tabysqa jetken úzdik joba ielerin anyqtap, marapattaityn «Órleý-2016» syilyǵyn saltanatty tabystaý rásimi ótti. Biylǵy «Órleý-2016» baiqaýynyń jeńimpazdary bolyp respýblikalyq «Ardagerler uiymy» qoǵamdyq birlestigi Almaty bólimshesiniń jetekshisi Erenǵaiyp Shaihýtdinov, «Kómektes» qoǵamdyq uiymynyń jetekshisi Aleksandr Sapelkin, «Reliance» qo­ǵamdyq qorynyń tóraiymy Sáýle Alpysova, ekologiialyq baǵyttaǵy «Ia – almatinets» qoǵamdyq birlestiginiń basshysy Konstantin Avershin, «Avrora» qoǵamdyq qorynyń basshysy Rýben Kazarian, «Sharapat» múgedekterdiń jastar uiymy» qoǵam­dyq birlestiginiń jetekshisi Raýshan Mananbaeva, «Diabet qory» qoǵamdyq qorynyń basshysy Natalia Týkalevskaia, «Fond Jenskogo liderstva» qoǵamdyq qorynyń tóraiymy Mariia Gýseinova, «Rodnik» qoǵamdyq uiymynyń tóraiymy Nina Balabaeva tanyldy.

Úzdik jobalarymen úlken jetis­tikke jetken ÚEU-nyń jeńim­paz­daryn Almaty qalasy Ishki saia­sat basqarmasynyń basshysy Nur­lan Sydyqov, Almaty qalasy Qoǵam­dyq keńesiniń tóraǵasy, «Turan» ýni­versitetiniń rektory Rahman Al­shanov, «Aqparattyq resýrs­tar ortalyǵy» qoǵamdyq qorynyń tór­aiymy Altynai Kóbeeva marapattady.

Jiynǵa qatysýshylar 25 qarasha kúni Astanada ótetin Qazaqstan Respýblikasy Azamattyq forýmyna delegat bolyp baratyn úmitkerlerdi usynyp, olarǵa daýys berdi, ná­tijesinde, 10 delegattyń esim-soiy naqtylandy.

Aigúl AHANBAIQYZY,

«Egemen Qazaqstan»

ALMATY