Sońǵy úsh jylda azamattarǵa qyzmet kórsetýden negizsiz bas tartýdyń 4 myńnan astam faktisi anyqtaldy. Bul týraly QR Memlekettik qyzmet isteri agenttigi tóraǵasynyń orynbasary Berik Berkimbaev aitty, dep habarlaidy QazAqparat.
«Agenttike júktelip otyrǵan ekinshi másele – barlyq ákimshilik rásimderge taldaý jasap, ár jarty jyl saiyn nátijesin, iaǵni biýrokratiia kórinisterin aldyn alý boiynsha naqty usynystar berip turý. Bul – rasynda óte ózekti másele. Sońǵy úsh jyldyń ózinde azamattarǵa qyzmet kórsetýden 4 myńnan astam negizsiz bas tartý faktileri anyqtalyp otyr. Mysaly, osy jyldyń aqpan aiynda Qostanai oblysy turǵynynyń jer máselesine qatysty ótinishi jer komissiiasymen oń sheshilse de, jer bóliminiń qyzmetkerlerimen negizsiz bas tartyldy. Árine, máselege agenttik aralasyp, azamattyń quqyǵy qalpyna keltirildi. Alaida, azamattar shaǵym aitpaityndyqtan, bizge belgisiz faktilerdiń jetkilikti ekeni anyq», - dedi ol Ortalyq kommýnikatsiialar qyzmetindegi baspasóz máslihatynda.
Onyń dereginshe, sońǵy 3 jylda qyzmet alýǵa kelgen 16 myńǵa jýyq azamattyń ótinishterin negizsiz ýaqytyn sozyp, áýre-sarsańǵa salǵan faktiler de anyqtalǵan. Sondai-aq zańda kórsetilmegen qujat suratyp, qoldan kedergi jasaý jaǵdailary da jii oryn alady. 3 jylda mundai 129 myń fakti tirkelgen.
«Al osylardyń barlyǵyna biýrokratiia sebep bolyp otyr. Óz kezeginde, Agenttik biýrokratiiany zerdeleý jáne oǵan qarsy tetikter qoldaný ortalyǵyna ainalady. Bul jumystyń azamattardyń, biznes ókilderiniń kómegi arqasynda tiimdiligi artatyny sózsiz», - dedi agenttik tóraǵasynyń orynbasary.
