Sýret: ortcom.kz
Zańdylyq pen tártip qaǵidatyn ornyqtyrý isi vandalizm, balalarǵa qarsy qylmys, turmystyq zorlyq-zombylyq siiaqty jaǵymsyz qubylystarmen kúresten bastalady. Bul týraly QR Memlekettik keńesshisi Erlan Qarin málimdedi.
"Mundai quqyqbuzýshylyqtarǵa qoiylatyn alǵashqy jáne óte mańyzdy tosqaýyl ─ azamattardyń olarǵa bei-jai qaramaýy. Sondyqtan elimizde júgensizdiktiń, ozbyrlyqtyń jáne qylmystyń kez kelgen túrine múldem tózbeýshilik ustanymyn qalyptastyrýdyń mán-mańyzy zor. Qoǵamda belsendi azamattyq kózqaras ústemdik quryp, izgilik, tilektestik, ózara kómek siiaqty basty qundylyqtar dáriptelýge tiis.
Memleket basshysy Qasym-Jomart Toqaev balalardyń qaýipsizdigi men olardyń quqyǵyn qorǵaý, turmystyq zorlyq-zombylyqqa qarsy kúres máseleleri týraly únemi aitady. Onyń sóilegen sózderinen dáiektilik jáne myzǵymas ustanym baiqalady. Prezident júgensizdiktiń kez kelgen túrine, vandalizm men zorlyq-zombylyqqa qatań tosqaýyl qoiý kerek, ásirese, áielder men balalarǵa qarsy qylmys úshin jazany kúsheitý qajet dep esepteidi" - dep jazdy ol Telegram-arnasynda.
Erlan Qarin Qazaqstanda 2020 jyldan beri otbasylyq-turmystyq zorlyq-zombylyqqa qarsy kúres jolynda júieli sharalar qabyldanyp kele jatqanyn da eske saldy.
"Ulttyq qoǵamdyq senim keńesiniń bastamalaryn iske asyrý aiasynda politsiianyń tiisti bólimsheleriniń shtattyq sany artty, otbasylyq-turmystyq zorlyq-zombylyq isterin qaraý úshin tergeýshi-áiel mamandyǵy engizildi.
Zańnamadaǵy sońǵy túzetýlerge sáikes, endi mundai qylmystar tek jábirlenýshi aryzynyń negizinde ǵana emes, sonymen birge kýágerlerdiń, kórshilerdiń málimeti, beinekameralardyń jazbasy jáne t.b. negizde anyqtalatyn bolady. Budan bólek, qazir bir ret ymyraǵa kelgen taraptardyń keiin qaita tatýlasýyna jol berilmeidi. Jalpy, turmystyq zorlyq-zombylyq úshin ákimshilik jáne qylmystyq jaýapkershilik kúsheitildi.
Árine, qoǵamda basqa kózqaras ta bar. Keibireýler zańnamany odan ári qatańdatý mundai qylmystardyń ashylý kórsetkishin tómendetedi dep esepteidi. Alaida tájiribe kórsetip otyrǵandai, jazanyń qatańdyǵy jáne odan bultarý múmkindiginiń bolmaýy ─ qylmysqa qarsy is-qimyldyń eń tiimdi tetigi" - dedi Memlekettik keńesshi.
Onyń pikirinshe, bul máseleni tek zańnamaǵa ózgeris engizý arqyly sheshý múmkin emes.
"Sonymen birge azamattardyń kózqarasy, moraldyq ustanymy da ózgerýi kerek. Osyndai áreketterge kóz jumyp qaraityn bolsaq, onda memleket qabyldap jatqan sharalardan esh nátije shyqpaidy.
Iaǵni, destrýktivti minez-qulyqtyń kez kelgen túrine qarsy kúres keshendi is-qimyldy talap etedi. Qoǵamda qylmysqa múldem tózbeýshilik qaǵidaty, al memlekettik deńgeide zań men tártip qatań saqtalý qaǵidaty dáriptelýi kerek. Sondyqtan memlekettik organdar men qoǵamdyq uiymdar júgensizdik pen zorlyq-zombylyqqa qarsy turýdyń tiimdiligin arttyrý úshin kúsh jumyldyryp, ortaq amal-tásil ázirleýi qajet" - dep túiindedi Qarin.
