Azamattar 42 500 teńge alǵan aida meditsinalyq saqtandyrý qoryna jarna tóleýge mindetti emes. Bul týraly Ortalyq kommýnikatsiialar qyzmetinde ótken brifingte «Áleýmettik meditsinalyq saqtandyrý qory» KeAQ jeke jáne zańdy tulǵalarmen jumys jónindegi departament direktory Zabira Orazalieva aitty, dep habarlaidy QazAqparat.
«Jyl sońynda buqaralyq aqparat quraldarynda 42 500 alýshynyń meditsinalyq saqtandyrý qoryna qaryzdar bolyp qalǵandyǵy týraly aqparat paida boldy. Iaǵni, azamattar bir rettik tólem alý úshin biryńǵai jiyntyq tólem jasaý arqyly ózin-ózi jumyspen qamtýshy ekenin dáleldedi. Kópshiligi biryńǵai jiyntyq tólem olardy meditsinalyq saqtandyrý qorynda saqtandyrdy dep oilady, biraq olai emes bolyp shyqty. Iaǵni, azamat 42,500 teńge alý úshin biryńǵai jiyntyq tólemdi tólep, keiin jumysqa tursa jáne MÁMS júiesinde saqtandyrylǵan degen mártebege ie bolý úshin ai saiyn meditsinalyq saqtandyrý qoryna jarna aýdaryp turǵysy kelse – aldymen bir jylǵy qaryzdy óteýi kerek pe? Osy máseleni túsindirip ótińizshi», - degen suraq qoiyldy brifingte.
Bul saýalǵa «Áleýmettik meditsinalyq saqtandyrý qory» KeAQ jeke jáne zańdy tulǵalarmen jumys jónindegi departament direktory Zabira Orazalieva jaýap berdi.
«Negizinde mindetti áleýmettik meditsinalyq saqtandyrý júiesinde meditsinalyq kómek alý quqyǵyna ie bolý úshin biryńǵai jiyntyq tólemdi tóleýshiler Qorǵa meditsinalyq kómek alǵan kúnnen bastap keminde úsh ai qatarynan jarna tóleýge mindetti. Iaǵni, eger siz ózińizdi biryńǵai jiyntyq tólemniń tóleýshisi retinde taǵaiyndaǵan bolsańyz, onda siz ai saiyn jáne úzilissiz turaqty tólemder júrgizip otyrýyńyz kerek. Eger tólem merziminde úzilister bolsa, onda siz qandaida bir aida biryńǵai jiyntyq tólem tóleýshi bolyp sanalmaisyz», - deidi ol.
Departament direktorynyń a itýynsha, zańnama biryńǵai jiyntyq tólemdi ótken kezeń úshin tóleýge jol bermeidi. Mindetti meditsinalyq saqtandyrý júiesinde meditsinalyq kómekke quqyq alý úshin jarna tólemegen adamdar sońǵy 12 aida jarna tóleýi kerek.
«Biryńǵai jiyntyq tólem birjolǵy áleýmettik járdemaqy – 42 500 teńge alý úshin tólendi. Sodan keiin vedomstvoaralyq komissiia osy sanattaǵy adamdardy 42500 mólsherinde áleýmettik kómek alǵan kezeńderi úshin jarnalar tóleýden bosatý týraly sheshim qabyldady, iaǵni 42 500 alǵan ailarda azamattar jarna tóleýge mindetti emes», - deidi Zabira Orazalieva.
