Foto: ashyq derekkóz
Taldyqorǵan qalasynda Aizat Jumanovanyń ólimine qatysty rezonansty is boiynsha sot úkimi shyqty, dep habarlaidy Ult.kz.
Sot Aibar Janbolatty Qylmystyq kodekstiń 99-baby 1-bóligi («Adam óltirý») boiynsha kináli dep tanyp, ortasha qaýipsizdik deńgeiindegi koloniiada 14 jyl bas bostandyǵynan aiyrý jazasyn taǵaiyndady. Sonymen qatar jábirlenýshi taraptyń azamattyq talaby ishinara qanaǵattandyrylyp, 20 mln teńge moraldyq ziian jáne 1,7 mln teńge ókildik shyǵyn óndirý týraly sheshim qabyldandy.
Sondai-aq sot Jetisý oblysy densaýlyq saqtaý basqarmasynyń basshylyǵyna qatysty jeke qaýly shyǵaryp, qylmystyq isti qaraý barysynda anyqtalǵan mán-jailarǵa nazar aýdaryp, bir ai merzimde tiisti sharalar qabyldaýdy mindettedi.
Aita keteiik, buǵan deiin memlekettik aiyptaýshy sottan aiyptalýshyǵa 15 jyl jaza taǵaiyndaýdy suraǵan. Al marqumnyń anasy kúieý balasyna ómir boiyna bas bostandyǵynan aiyrý jazasyn berýdi talap etken.
Qaiǵyly oqiǵa 2025 jylǵy 22 maýsymda Jetisý oblysynyń Aqsý aýdanynda bolǵan. Tergeý derekterine sáikes, Balasaz aýylynyń turǵyny Aizat Jumanova aýyr jaraqattarmen aýrýhanaǵa jetkizilip, jansaqtaý bóliminde kóz jumǵan. Keiin is bastapqyda «densaýlyqqa qasaqana aýyr ziian keltirý» babymen tergelip, keiinnen «adam óltirý» babyna qaita saralanǵan.
Sot otyrysynda marqumnyń týystary áieldiń kóp saǵat boiy asa qatygezdikpen soqqyǵa jyǵylǵanyn aityp, bul jaǵdai eki jasar balanyń kózinshe bolǵanyn málimdedi. Al aiyptalýshy buryn áieliniń «terezeden qulap ketkenin» aitqanymen, saraptama qorytyndylary aýyr dene jaraqattaryn rastaǵan.
