Elimizdiń joǵary oqý oryndary pedagogikalyq qaita daiarlaý baǵdarlamalaryn ázirlep jatyr. Bul jaiynda Májilis depýtattarynyń saýalyna QR Bilim jáne ǵylym ministri Ashat Aimaǵambetovtiń jaýabynda aitylǵan, dep habarlaidy "Ult aqparat".
«Daryndy jastardy pedagogikalyq mamandyqqa tartý maqsatynda muǵalimniń mártebesin kóterý úshin tiisti jumys jalǵastyrylýda. Pedagogikalyq baǵyt boiynsha oqýǵa túsýge qoiylatyn talaptar birtindep kúsheitilýde. Osylai, 2020 jyly oqýǵa túsý baly 60-tan 70 balǵa deiin kóterildi, arnaiy emtihan mazmuny ózektendirildi. Pedagogikalyq joǵary oqý oryndarynda (budan ári - JOO) oqityn stýdentterdiń stipendiiasy ulǵaityldy (26 186-nan 42 000 teńgege deiin). Mektep muǵalimderiniń eńbekaqysy ósti. Mektep oqýshylary arasynda kásiptik baǵdar berý jumysyn júrgizý úshin JOO-lar bilim basqarmalarymen, mekteptermen ózara is-qimyl jasaidy», - dedi ministr.
Onyń atap ótýinshe, qazirgi ýaqytta barlyq bilim berý baǵdarlamalary Pedagogtiń kásibi standartyna jáne jumys berýshilerdiń talaptaryna sáikes jańartyldy. Bul rette, pedagogikalyq praktikaǵa arnalǵan Ádistemelik usynystar jasalynǵan jáne oqytýdyń barlyq kezeńinde praktikany uiymdastyrýdy kózdeitin úzdiksiz praktikalyq oqytý júiesi engizildi. 2018 jyldan bastap pedagogti attestattaý rásimderiniń jańa formaty engizildi. Osyǵan bailanysty ministrlik normativtik-quqyqtyq qujattarǵa ózgerister engizý boiynsha jumys júrgizdi. Oǵan sáikes 2021 jyldan bastap pedagogikalyq JOO-lardyń túlekteri úshin Ulttyq biliktilik testileýinen mindetti ótý normasy engizildi. Atalǵan shara túlekterdiń quzyrettiligin rastaýǵa jáne bilim berý uiymdaryn bilikti jas mamandarmen qamtamasyz etýge múmkindik beredi.
«Tájiribe almasý aiasynda JOO oqytýshylarynyń jappai ashyq onlain kýrstaryn ázirlep, bilim berý platformalaryna ornalastyrýǵa múmkindikteri bar. Sonymen qatar, JOO-lar mekteptermen birlesip ózara tájiribemen almasý jáne stýdentterge innovatsiialyq pedagogikalyq tehnologiialar men ádisterdi tiimdi oqytý maqsatymen konsortsiým qurdy. Qazirgi ýaqytta JOO-lar pedagogikalyq qaita daiarlaý baǵdarlamalaryn ázirleý boiynsha jumys júrgizýde. Osy baǵytta ministrlik JOO-larǵa pedagogikalyq-psihologiialyq daiyndyqty kúsheitý úshin pedagogikalyq qaita daiarlaý baǵdarlamalarynyń mazmunyn ózgertip, oqý nátijelerin túzetýdi usyndy», - dedi Ashat Aimaǵambetov.
Sonymen qatar ministr jas mamandardy mektep jumysyna yntalandyrý úshin sheteldik JOO-lardy, «Bolashaq» baǵdarlamasyn, aǵylshyn tilinde pánderdi oqytý quqyǵymen bitirýshiler, sondai-aq Prezidenttik kadr rezervine kirgen adamdar úshin «pedagog-moderator» biliktilik sanatyn berýdiń jeńildetilgen tártibi engizilgenin atap ótedi.
«Osylaisha, ministrlik pedagogikalyq bilim berý sapasyn arttyrý jáne mektepterdi joǵary bilikti muǵalimdermen qamtamasyz etý boiynsha júieli, keshendi jumysty júzege asyrýda», - dedi ol.
