QR Bilim jáne ǵylym ministri Ashat Aimaǵambetov biyl mektep bitirip jatqan jas túlektermen óz tájiribesi týraly aitty, dep habarlaidy "Ult aqparat".
"Qurmetti túlekter! Mine, oqý jyly óz máresine jetti. Bul oqý jyly búkil álemdegi oqýshylar men stýdentter úshin ońai bolǵan joq. Álemdik bilim birý júiesi pandemiia syndy úlken synaqtan ótti. Biz muǵalimdermen birlese otyryp bilim berý júiesine jańa dem berip, olarǵa barynsha qajetti jaǵdai jasaýǵa tyrystyq.
Sizder oqýlaryńyzdy aiaqtap jatyrsyzdar. Keibir túlekter joǵary oqý oryndaryna nemese kolledjderge tússe, endi bireýleri jumys isteidi. Qalai bolsa da, aldaǵy ýaqytta sizderdi jańa múmkindikter men jańa ómir belesteri kútip tur.
Mektep bitirip jatqan kezim áli esimde. Úlken ómirge qadam basar aldyndaǵy qorqynysh, ýaiym, kúdik, josparlar men bolashaqqa degen úmit. Ol kezde is júzinde bári basqasha ekenin túsinbegen ekenmin. Tipti, men oilaǵannan da ońai eken dep aitýǵa bolady. Osyǵan orai óz tájiribemmen bóliskendi jón kórdim.
Birinshiden. Eshqashan qiyndyqtarǵa moiymańyzdar. Kózdegen maqsatyńa jetý jolynda áldebireýdiń aitqanyna ermei, týra joldan taimaý kerek.
Basymnan ótken bir oqiǵany aityp bereiin.
Diplom alǵannan keiin eki apta ótken soń máslihat depýtatyǵyna sailaý ótetindigi týraly habarlandyrýdy kózim shalyp qaldy. Dostarymmen aqyldasyp, sailaýǵa qatysýǵa bel býdym.
Qolynda ótinishi bar 21 jastaǵy jigitti kórgen sailaý komissiiasyndaǵy mamandar maǵan kúle qarady. Qarsylastarymnyń da maǵan degen kózqarasy sondai boldy. Sailaýshylarmen alǵashqy kezdesýlerim de esimde. Jas balanyń depýtattyqqa úmitker ekenin kórgende sailaýshylarymnyń jartysynan kóbi teris ainalǵan bolatyn.
Shtabymnan basqa eshkim meniń jeńiske jetetinime senbei, bári bul múmkin emes deýmen boldy. Kásipkerler, jetekshiler jáne tanymal qairatkerlerden turatyn 11 qarsylasym bolsa da, eńbek jáne jeńiske degen senim arqyly keshegi stýdent, qarapaiym jigit osy sailaýda jeńiske jetti. Al 4 jyldan keiin qaita sailandym.
Shyn máninde bul sailaýdan utqanym kóp boldy. Sailaýshylardyń senimine ie bolyp, óz kúshime degen senimim de nyǵaia tústi.
Sondyqtan adam balasy óz kúshi men armanyna senýi kerek. Qulasań da qaita turyp, alǵa umtylýǵa tyrysý kerek. Esterińizde bolsyn, taǵdyr maqsaty aiqyn jáne alǵan betinen qaitpaityn adamdardy jaqsy kóredi.
Ekinshiden. Qatelesýden qoryqpaý kerek. Qatelik jasalsa, ómir sonymen aiaqtalmaidy. Barlyq adam qatelesedi.
Eń bastysy - óz qateligimizdi ýaqytyly túsinip, túzetýge tyrysýymyz áldeqaida mańyzdy. Barynsha kúsh-jigerimizdi salyp, alǵan betten qaitpaǵanymyz abzal. Mine, bul bolashaqta tabysqa qol jetkizetin adamǵa tán qasiet.
Mektepti bitirgennen keiin men birden grantqa túse almadym. Jalpy jaqsy ball jinaǵanyma qaramastan, beiindik pán boiynsha az ball alǵandyqtan, grant jeńip ala almadym. Sol kezde bul jaǵdaidy ómirimdegi úlken qatelik dep sanadym, ómirim aiaqtalǵan siiaqty boldy.
Biraq keiin bul jaǵdaiǵa degen kózqarasym ózgerip, ony ómirimdegi kezekti synaq dep qabyldadym. Taǵy bir jyl daiyndalyp, UBT-ny qaita tapsyrdym. Jaqsy ball jinap, grantty jeńip aldym. Bul oqiǵa maǵan kóp nárseni úiretken ómirlik sabaq bolǵanyn jete túsindim. Óz kúshińizge degen senim men qatelikterge moiymai, aiaqqa qaita turý - adam balasy úshin óte mańyzdy dep bilemin.
Úshinshiden. Basqalarǵa qaraǵanda erekshe bolýdan uialmańyzdar.
Eń bastysy ózińizge adal bolyńyz. Basqa adamdarmen aralasyp, dos bolyńyzdar. Ata-analaryńa qamqor bolyp, baýyrlaryńyzben bailanysty eshqashan joǵaltpańyzdar. Keiin, múmkin 30 jasqa kelgende, ata-ananyń bergen aqyl-keńesteri oryndy ekenin túsine bastaisyzdar.
Boilaryńyzda jańa ádetter qalyptastyryńdar! Densaýlyqtaryńdy nyǵaityńdar! Búkil álem qarsy bolsa da, qaisarlyq tanytyp, alǵan baǵyttan qaitpaǵan jón.
Qazir “qai ýniversitetti tańdasam eken” dep oilanyp júrgen bolarsyzdar. Árine, bul óte mańyzdy másele. Endi árbir joǵary oqý orny túlekterine memlekettik emes, ózindik úlgidegi diplom beredi. Kelesi jyldan bastap diplomnyń ǵana bolýy jetkiliksiz, sonymen birge naqty bilim men daǵdylardyń bolýyn dáleldeý qajet bolmaq. Tipti ony sertifikatpen rastaý kerek bolady. Sondyqtan myqty oqý ornyn tańdap, bolashaqqa zor senimmen qadam basýǵa shaqyramyn.
Oqý qunynyń arzandyǵy, sabaqty bosatý, emtihan tapsyrmai-aq oqýdy aiaqtaý syndy “múmkindikterge” qyzyqpańyzdar. Bul jaqsylyqqa alyp kelmeitin áreket dep esepteimin. Sol sebepti JOO tańdaǵan kezde Ýniversitettiń bedeline, oqý ornyna qatysty jumys berýshilerdiń pikirine, halyqaralyq akkreditteýdiń bolýyna, tarihyna mán bergenderińiz abzal.
“Ómir atty beleste tek bir ret qana bilim alý jetkilikti” degen eski qaǵida óz kúshin joǵaltty. Tabysqa jetý úshin biz ómir boiy oqýymyz qajet. Kún saiyn jańa tehnologiialar paida bolyp jatyr. Ómirimizdegi jańa trendter - bul úzdiksiz oqý uǵymymen para-par.
Sondai-aq bilim ministri retinde myqty túlekterdi pedagog mamandyǵyn tańdaýǵa shaqyramyn. Óitkeni, bilim sapasy, eldiń bolashaǵy joǵary oqý oryndaryn aiaqtap shyǵatyn muǵalimderge tikelei bailanysty. Bul úlken dárejege ie jáne óte qurmetti mamandyq.
Muǵalim mamandyǵynyń mártebesin arttyrý úshin Prezidenttiń tapsyrmasy boiynsha biz pedagogterdiń jalaqysyn belsendi túrde arttyryp jatyrmyz. Shamadan tys eseptilikti alyp tastadyq. Bolashaq pedagogterdiń stipendiiasy eń joǵary stipendiia bolyp tabylady, bul baǵyttaǵy jumystar ári qarai da jalǵasyn tabady.
Qurmetti jas túlek! Alǵa qoiǵan maqsattaryńyzǵa jetińizder. Batyl bolyńyzdar. Bári óz qoldaryńyzda ekenin esterińizde saqtap júrińizder.
Sóz sońynda aitarym: ózderińdi shektemei, keń ári aýqymdy oilaýǵa tyrysyńdar. Sonda ǵana tolaǵai tabystarǵa jetesizder! Ómirlerińizdegi jańa kezeń qutty bolsyn, dostar! Bolashaqta jańa jetistikterge jete berińder!" - dedi ministr óz sózinde.
