Qazaqstanda mektepterde bilim berý 4 baǵytta júrgiziletin bolady. Bul týraly Ortalyq kommýnikatsiialar qyzmetindegi brifingide QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
«Qashyqtan oqytýǵa keler bolsaq, aýyl mektepterine jáne shalǵaidaǵy shaǵyn jinaqty mektepterde oqityn balalarǵa qiyn bolady. Sondyqtan eń basty nazardy osy máselege aýdaryp, tiisti jumysty bastap kettik. Jumys jalpy qalai júrgiziledi degen saýalǵa jaýap beretin bolsaq, 4 baǵyt boiynsha jumys júrgizip jatyrmyz. Birinshi baǵyt - teledidar arqyly tiisti sabaqtardy berý. Qazirgi ýaqytta jumys júrgizilip, respýblikalyq 2 telearna kelisimin berdi. Ol -»Balapan« men «El arna« telearnasy. Biz osy telearnalar arqyly sabaqtarymyzty tiisti keste boiynsha kúnine 8 saǵat beremiz», - dedi ministr.
Onyń atap ótýinshe, 4-toqsandy qamtý úshin 3 360 sabaq túsirý kerek. Qazirgi ýaqytta osy sabaqtardyń 300-den astamy túsirilip, daiyn bolǵan.
«Árine, bul óte kúrdeli másele. Osyndai úlken indet bolyp jatqanda ustazdarymyz telearnalarǵa kelip, tiisti túsirilimge qatysýda. Ustazdarymyz túsirilimge daiyn bolmaǵan. Telejúrgizýshi retinde ózin jańa rólde synap jatyr. Sabaqtaryn daiyndap, ony 10-15 minýtqa túsinikti ári bala jalyqpaityndai durys formatta berý de úlken emtihan. Túsirilimge qatysyp jatqan ustazdarǵa alǵys aitqym keledi», - dedi ol.
Ministr kelesi úlken baǵyt - bul radio ekendigin aitty.
«Biz teledidar signaly jetpeitin eldi mekenderde Qazaq radiosy bar ekendigin jaqsy bilemiz. Qazaq radiosymen de kelisimge keldik, radiodan da tiisti kestege sáikes sabaq júrgiziledi. Úshinshi baǵyt - poshta arqyly. Ózderińiz de bilesizder, bizde 1 200 eldi meken bar. Olar óte shaǵyn eldi mekender, olarda 3, 4, 5 oqýshy ǵana bar. Olardy munyń aldynda kúndelikti kólikpen mektepke alyp kelip, alyp ketetinbiz. Biz bul balalarǵa da bilim berýmiz kerek. Sondyqtan da poshta arqyly da osy jumysty júrgizemiz», - dedi ol.
Elimizdiń bas muǵalimi tórtinshi baǵytta internet júiesi arqyly sabaq júrgiziletindigin aitty.
«Jalpy, qysqa ýaqyttyń ishinde birneshe internet platformalaryn, tsifrlyq resrýstardy daiyndap boldyq. Eń bastysy ustazdarymyz osy tsirflyq platformalardy paidalana bilý máselesine de úlken kóńil bólýdemiz. Sondyqtan ár mektepte, kolledjde, JOO-da, bilim bólimderi, basqarmalarynda osy jumys júrgizilip jatyr»,- dedi Ashat Aimaǵambetov.
