Foto: Májilis
Májilis depýtaty Ashat Aimaǵambetov salyq zańnamasyna usynylǵan túzetýlerge qatysty túsinikteme berip, birqatar taýarlar men qyzmet túrlerine qatysty 0% QQS mólsherlemesin saqtap qalý bastamasyn qorǵady. Onyń aitýynsha, bul usynys – áleýmettik ádilettilik pen ulttyq qundylyqtardy qorǵaýǵa baǵyttalǵan, dep habarlaidy Ult.kz.
Dári-dármek pen emdeý qyzmetteri
Depýtattyń málimdeýinshe, onkologiia, diabet, sirek kezdesetin jáne aýtoimmýndyq aýrýlar sekildi aýyr dertter boiynsha dári-dármekter men emdeý qyzmetterine QQS engizý olardyń baǵasynyń 16%-ǵa deiin qymbattaýyna alyp kelýi múmkin. Bul, eń aldymen, naýqastar men olardyń otbasylaryna aýyr salmaq túsiredi.
“Bul jai ǵana salyq máselesi emes, bul – adamgershilikke qatysty sheshim,” – dedi Aimaǵambetov.
Kitaptar men animatsiia
Onyń aitýynsha, otandyq kitaptarǵa QQS salý olardyń qunyn arttyryp, oqyrmanǵa qoljetimsiz etýi yqtimal. Bul – qazaq avtorlary men aýdarmashylarynyń eńbegin elemeý bolyp sanalady. Sonymen qatar, ol animatsiia salasyn da salyqpen emes, naqty qoldaýmen damytý qajettigin aitty.
Qarjylyq qyzmetter
Bank kartalarymen aýdarymdarǵa QQS engizý qarapaiym halyqqa, ásirese stýdentter, zeinetkerler men shaǵyn kásip ielerine qosymsha shyǵyn ákelýi múmkin ekenin eskertken depýtat, qarjylyq qyzmetterdi QQS-tan bosatý halyqaralyq tájiribege de sai keletinin atap ótti.
Alternativti usynystar
Aimaǵambetov salyq saiasatyn ádil etý úshin kelesi usynystardy ortaǵa saldy:
- - býkmekerlik keńseler men kazinolarǵa salyqty kóterý;
- - quramynda transmai bar ónimderge aktsiz engizý;
- - bankterge salynatyn korporativtik tabys salyǵynyń mólsherlemesin arttyrý.
Talqylaý jalǵasýda
Depýtat salyq kodeksine qatysty túzetýler áli de talqylaý satysynda ekenin aityp, jumys toby men Májilis deńgeiinde usynystar qaralatynyn jetkizdi.
“Másele – bárin bárinen bosatýda emes. Másele – ádil ári teńgerimdi salyq júiesin qalyptastyrýda,” – dedi ol.
