Bilim jáne ǵylym ministri Ashat Aimaǵambetov mektepterde menedjment sapasyn arttyrý týraly pikir bildirdi, dep habarlaidy "Ult aqparat".
«Tiimdi menedjmenttiń nátijesinde mektepte kásibi ujym men oqýǵa arnalǵan qolaily orta qurylady. Sondyqtan osy máselege nazar aýdarý óte mańyzdy.
Bir aýdanda ornalasqan eki mektep, birdei baǵdarlama boiynsha jumys isteitin, biýdjeti, múmkindikteri men infraqurylymy da birdei kórshi turǵan qos bilim ordasy eki bólek nátije kórsetetin jaǵdailar kezdesedi.
Zertteý nátijelerine súiensek, mundai aiyrmashylyq kóbinese mektep basshysyna bailanysty. Óitkeni tek myqty direktor ǵana úzdik nátijelerge qol jetkizetin uiymshyl ujym qalyptastyra alady», - dep jazdy ministr Facebook -tegi paraqshasynda.
Onyń aitýynsha, mundai direktor jumysty tiimdi uiymdastyryp, ata-analar, oqýshylar jáne bilim berý qurylymdarymen ashyq jumys isteidi. Sonymen birge qyzmetkerlerdi jigerlendirip, tek jetekshi bolyp emes, shyǵarmashylyq turǵyda shabyttandyrýshy ári kóshbasshy da bola biledi.
«Búgingi tańda biz kadr máselesine tap bolyp otyrmyz. Direktor nemese oqý isiniń meńgerýshisine qoiylatyn talaptarǵa sáikes keletin, atalǵan laýazymdarda jumys isteýge nietti myqty qyzmetkerlerdiń qatary sirep barady, degen Ashat Aimaǵambetov onyń birneshe sebebin aityp berdi. «Muǵalimdermen salystyrǵanda direktorlarǵa jaýapkershilik kóbirek júktelip, jalaqynyń tómen bolýyna bailanysty myqty pedagogter mektep direktory bolǵysy kelmei jatady.
Bul máselege áser etetin basqa da birqatar sebep bar. Sondyqtan orta bilim berý uiymdarynyń basshylary qoldaýdy qajet etetini sózsiz.
Memleket basshysy Qasym-Jomart Kemelulynyń tapsyrmasy boiynsha biz mektep basshylyǵy laýazymyna taǵaiyndaý tártibi, biliktilikti arttyrý júiesi, eńbekaqy tóleý jáne mektep direktorlaryn attestattaý rásimin qaita qarap jatyrmyz. Sondai-aq rotatsiialaýdyń jańa institýty engizilip jatyr», - dedi ol.
Ministr birneshe jazbasynda osy suraqtarǵa toqtalyp, qabyldanyp jatqan sheshimderdiń sebepteri men mán-maǵynasyn ashyp aitýǵa tyrysatynyn jetkizdi.
Sondai-aq, Ashat Aimaǵambetov attestattaý boiynsha pikir bildirdi.
«Alǵash ret bilim berý uiymdarynyń basshylary men olardyń orynbasarlaryna attestattaý jáne biliktilik sanatyn berý júiesi engizilip jatyr. Attestattaý úsh jylda bir ret ótkizilip, eki kezeńnen turady.
Birinshi kezeńde zańnama boiynsha bilimin tekserýge arnalǵan jáne basqarýshylyq quzyretteri boiynsha test tapsyrady.
Ekinshi kezeńde bilim berý uiymdarynyń basshylary belgili bir ýaqyttaǵy atqarǵan jumysynyń tiimdiligi baǵalanady. Oqý meńgerýshileri úshin attestattaý testileýsiz tek bir kezeńnen turatynyn atap ótkim keledi», - dedi ministr.
Onyń aitýynsha, attestattaý nátijeleri boiynsha komissiia atqaratyn laýazymyna sáikestigi/sáikes emestigi týraly jáne úsh sanattyń bireýin berý týraly sheshim qabyldaidy. Iaǵni, laýazymyna sáikestigi belgili bolsa, direktorǵa sanat beriledi. Kerisinshe, laýazymǵa sáikes emes bolsa, direktor jumystan bosatylýy múmkin.
Berilgen sanatqa bailanysty direktor nemese oqý isiniń meńgerýshisi sanat úshin laýazymdyq jalaqydan 30%, 70%, 100% mólsherinde qosymsha aqy alatyn bolady.
Sonymen qatar mektep direktory men onyń orynbasarlarynyń laýazymdyq jalaqysy jyl saiyn 25%-ǵa artady.
«Bul sharalardyń barlyǵy mektep basshylyǵynyń jalaqysyn muǵalimderdiń ortasha jalaqysynyń deńgeiine jaqyndatýǵa múmkindik beredi.
Degenmen, qabyldanyp jatqan bul sharalar mektep basshysy laýazymyna eń myqty mamandardy tartý úshin jetkiliksiz.
Basshylarǵa eńbekaqy tóleý júiesinde buryn-sońdy yntalandyrýshy faktorlar bolǵan joq. Kóshbasshynyń jalaqysy onyń tiimdi nemese tiimsiz bolýyna bailanyssyz birdei bolatyn. Sonymen qatar mektepte 80 bala oqityn bilim ordasynyń direktory men 1200 bala bilim alatyn mektep direktory birdei jalaqy alady.
Qazir biz attestattaýdy jáne jumys tiimdiligi úshin qosymsha aqy tóleý júiesin engizip jatyrmyz. Sondai-aq mekteptiń jobalyq qýattylyǵyna bailanysty laýazymdyq jalaqyny differentsiialaýdy engizý josparda bar.
Sondyqtan aldaǵy ýaqytta da biz mektepterdi eń myqty pedagogterdiń basqarýy úshin sharalar usynatyn bolamyz», - dedi Ashat Aimaǵambetov.
Ol mektep direktorlaryn irikteý, taǵaiyndaý jáne olardy rotatsiialaý júiesi de mańyzdy ekenin aitty. Uzaq talqylaýlardan keiin osy júiege engiziletin eleýli ózgeristerdi daiyndaǵanyn jeitkizdi. «Bul týraly kelesi jazbamda tolyǵyraq aitamyn», dep ýáde berdi.
