Bilim jáne ǵylym ministri Ashat Aimaǵambetov mektepterdiń kórkem ádebi kitaptarǵa suranys bermeitinine alańdaýshylyq bildirdi, dep habarlaidy "Ult aqparat".
«Bizde oqýlyqtarǵa tapsyrys berý jaǵynan problema bar. Mektep oqýlyq kólemi boiynsha bir suranys, al bilim basqarmasy nemese bólimi ekinshi kólem boiynsha suranys joldaidy. Sebep túsiniksiz. Bálkim bul baǵytta Sholpan Tańatqyzy (vitse-ministr Qarinova) arnaiy monitoring tobymen máseleni baqylaýǵa alý kerek bolar. Táýekelder kóp», - dedi Ashat Aimaǵambetov Bilim jáne ǵylym ministrliginiń apparattyq otyrysynda.
Ministr sonymen qatar mektepterdiń kórkem ádebietke suranys bermeitinin aityp qaldy.
«Biz balalardyń oqýǵa, kitapqa, ádebietke degen mahabbatyn oiatqymyz keledi. Biraq oqý oryndary men mektepter kórkem ádebi kitaptardy alǵysy da kelmeidi. Kerek deseńiz, qazir tiisti ádebi kitaptardyń qory da qalmai barady. Sol sebepti bul máseleni de nazarǵa alaiyq», - dedi Ashat Aimaǵambetov.
Eske sala ketsek, buǵan deiin Ashat Aimaǵambetov mektepterge oqýlyq jetkizýge qatysty jyl saiyn qaitalanatyn problemany kótergen bolatyn.
«Jyl saiyn bizde oqýlyqtardy jetkizý (mektepterge) boiynsha problema týyndaidy. Sol sebepti osy jyldyń 31 naýryzyna deiin oqýlyqtardy jetkizý boiynsha memlekettik satyp alý jumysyn aiaqtaýdy tapsyramyn. Ádettegidei, shilde nemese tamyz ailaryna deiin kútýdiń qajeti joq. Olai etsek, jyl saiyn osy problemamen betpe-bet kele beremiz. Bul jumysty 31 naýryzǵa deiin atqarýǵa eshteńe kedergi keltirip turǵan joq», - dedi ol.
