Foto: Pexels.com
Qazaqstannyń eńbek naryǵyn damytý jáne kadrlyq áleýetin nyǵaitý taqyrybyndaǵy Úkimet saǵatynda Áleýmettik-mádeni damý komitetiniń tóraǵasy Ashat Aimaǵambetov Qazaqstandaǵy kolledjder máselesin kóterdi. Bul týraly Ult.kz habarlaidy.
Ol kolledjder boiynsha biryńǵai bilim berý tapsyrysyn qalyptastyrý jáne kolledjderdi jedel basqarýdy Oqý-aǵartý ministrligine tikelei berý máselesin qarastyrý usyndy. Aitýynsha, "Jas maman" jobasyn jandandyryp, qalǵan 180 kolledjdi jabdyqtaý kerek.
"Kolledjdegi granttyń qunyn aitarlyqtai ulǵaitý qajet jáne bir stýdentti oqytý qunynyń ádistemesinde praktikalyq jumysqa, shyǵyn materialdaryna jáne jabdyqtarǵa jumsalatyn shyǵyndardy eskerý kerek. Naqty kásiporynnyń ózine maqsatty bilim granttaryn berý tájiribesin eńgizý usynylady. Iaǵni, grant jumys berýshiniń ózine beriledi, ol bolashaq jumysshylaryn — kásiporynnyń ózi tańdaidy. Óz kezeginde jumys berýshi túlekti jumysqa ornalastyrý týraly kepildeme beredi, dýaldi oqytýdaǵy praktika ornyn, bilim berý baǵdarlamasyn ázirleýge qatysýdy da kepildeidi. Al biz ol stýdentterdi oqýyn aiaqtaǵannan keiin osy kásiporynda jumys isteý mindetin zańnamalyq túrde engizýdi josparlap otyrmyz. Nynsanaly grant pen nysanaly jumysqa turǵyzý", - dep usynys aitty depýtat.
Sondai-aq Aimaǵambetov 10-11 synyp oqýshylaryna óz tańdaýy boiynsha mekteptegi oqýymen birge kolledjderde paralleldi túrde oqýǵa múmkindik berýdi usyndy. Bul mektep túlegine 11 synypty aiaqtaǵannan keiin attestatpen qatar, naqty biliktiligi bar diplom alýǵa, negizgi pánderdi eki ret oqýdy boldyrmaýǵa múmkindik beredi.
"Kolledjder janyndaǵy oqý-óndiristik kombinattar (OÓK) tájiribesin qaita bastaý qajet. Biraq mektepter janynda olardy ashý múmkin emestigin túsiný kerek, ǵimarattar da, qarajat ta joq. Al kolledjderdiń áleýetin paidalaný ábden múmkin. Osy jobany engizip, mektepter men kolledjder arasyndaǵy ózara bailanysty ornatý qajet", - deidi ol.
Osydan keiin depýtat mektepterdiń shtattyq kestesine kásibi baǵdar berýshilerdi engizgenimen, ákimdikter qarajat bólmeitinin atap ótti. Shtat bar, aqsha joq, iaǵni proforientatorlar jumys istemeidi, deidi.
"Ýniversitetterdi de bir ministrlikke berý máselesin qarastyrý usynylady. Ár ministrlik bólek basqarǵany tiimsiz. Joǵary bilim ministrligi bir jerden basqarǵany bilim sapasy úshin tiimdi", - dedi A.Aimaǵambetov.
Buǵan deiin Ashat Aimaǵambetov Angliiada «qulpynai terip júrgen» azamattardy sanap jatqan eshkim joq ekenin aitqan bolatyn. Sondai-aq Aimaǵambetov jumyspen qamtý baǵdarlamalaryn synady.
