Qazaqstan halyq partiiasynyń kezekten tys XVI sezi ótti, dep habarlaidy QazAqparat.
Jiyn barysynda Parlament Májilisi jáne máslihattar depýtattarynyń sailaýyna qatysý, Sailaýaldy baǵdarlama, respýblikalyq sailaýaldy shtabty qurý, depýtattyqqa kandidattardyń partiialyq tizimi qaraldy.
«Partiianyń 2021 jylǵy 10 qańtardaǵy Parlament Májilisi jáne máslihattar depýtattaryn sailaýǵa qatysýy týraly usynys engizilip otyr. Esepti kezeńde halyqtyń qoldaýy turǵysynda partiia óziniń brendin ózgertti, iaǵni Qazaqstan kommýnistik halyq partiiasynan Qazaqstan halyq partiiasy dep ataldy. Biz ýaqyt talabymen alǵa qarai ilgerileýge niettimiz jáne osyny durys qadam dep esepteimiz. Osy oraida el halqy bizdiń bastamalardy qoldaitynyna senimdimiz», - dedi partiia tóraǵasy Aiqyn Qońyrov.
Onyń aitýynsha, fraktsiia únemi partiialyq ustanymdar aiasynda qyzmet etip, halyq múddesine sai jumys istedi. Osy oraida ol partiia qyzmeti jer resýrsy, tabiǵi bailyqy el igiligine paidalanylýyna negizdelgenin atap ótti.
«Bizdiń Parlamenttegi fraktsiia aýqymdy bolmasa da, atqarǵan jumysy eleýli. Ótken bes jylda fraktsiianyń 92 otyrysy ótkizildi, 300-ge jýyq depýtattyq saýal joldandy. Eldi mekenderge 664 jumys sapary jasalyp, halyqpen 1450 kezdesý boldy. Úsh myń nan astam jeke ári zańdy tulǵalardyń ótinimi qaraldy», - dedi A. Qońyrov.
Eske sala keteiik, biyl qarasha aiynda Qazaqstan kommýnistik halyq partiiasynyń ataýy ózgerip, rebrending jasaldy. Endi Qazaqstan halyq partiiasy dep atalatyn boldy.
