Ótken aptada Norvegiia astanasy Osloda 28-shi «FILM fra SØR» («Ońtústik filmi») sheteldik filmder festivali ótti. Oǵan Aziia, Afrika jáne Latyn Amerikasy elderinen 80-nen astam taspa qatysty, dep habarlaidy "Ult aqparat".
Oǵan Qazaqstannan rejisser Sergei Dvortsevoidyń «Aika» filmi jáne Venetsiia kinofestivaliniń jeńimpazy Emir Baiǵazinniń jumystary usynyldy.
Festivalde «Derekti film», «Aýditoriia júldesi», «Jańa daýys» jáne «Kúmis aina» atalymdary boiynsha jeńimpazdar anyqtaldy.
«Aika» filmin qazylar alqasy bir aýyzdan «Jańa daýys» atalymynyń jeńimpazy dep tanydy.
«Qazaqstandyq aktrisa Samal Esliamova Sergei Dvortsevoidyń filmin jalǵyz ózi súirep júr. Kamera onyń árbir qimylyn baǵyp otyrady, tipti biz, kórermender bas keiipkermen úndes, pikirles bolamyz», - deidi norvegiialyq kinosynshylar.
«Derekti film» atalymynda kongolyq rejisser Emmanýel Grastyń «Makala» filmi jeńiske jetti. Kórermen kóńilinen shyqqan film retinde japon rejisseri Hirokadzý Korideniń «Dúken tonaýshy» filmi tanylsa, ońtústikkoreialyq rejisser Li Chang Dong túsirgen «Órteý» filmine «Kúmis aina» syilyǵy berildi.
«Aika» filminiń túsirilim tobynan eshkim bolmaǵandyqtan, nagrada Osloda akkredittelgen qazaqstandyq diplomattarǵa tapsyryldy.
Emir Baiǵazin «FILM fra SØR» festivaline «Úndestik sabaqtary», «Jaraly perishte» jáne «Ózen» filmderin, sondai-aq «Juldyzdy kórgińiz kele me?» atty jańa jumysyn usyndy. Synshylar onyń shyǵarmashylyǵyna joǵary baǵa berdi.
Shara aiasynda Emir Baiǵazin Qazaqstan Elshiliginde qazaq diasporasy ókilderimen kezdesip, shyǵarmashylyq josparlaryn bólisti.
